Մոսկվան բողոքի նոտա է հղել Երևանին Գյումրիում Հայրենական մեծ պատերազմի հերոսներին նվիրված «Մայր Հայաստան» հուշահամալիրի պղծման դեպքի առիթով։ Այս մասին այսօր կայացած ճեպազրույցի ժամանակ հայտարարել է Ռուսաստանի արտաքին գործերի նախարարության մամուլի խոսնակ Մարիա Զախարովան։
«Գյումրում տեղի է ունեցել հրեշավոր միջադեպ՝ վանդալիզմի ակտ Հայրենական մեծ պատերազմի հերոսների հուշարձանի նկատմամբ։ Այս հուշարձանը կոչվում է «Մայր Հայաստան»։ Հունիսի 10-ին հայտնվեցին այս հուշարձանի պղծման մասին հաղորդագրություններ։ Եվ, իհարկե, դա խորը վրդովմունք է առաջացնում։ Այս սրբապիղծ արարքը ոչ միայն խուլիգանություն է, այլև նպատակային հարձակում մեր երկրների համատեղ պատմական հիշողության վրա և Մեծ Հաղթանակը պղծելու փորձ։ Բնականաբար, մենք բողոքի նոտա ենք ուղարկել հայկական կողմին», - ասել է դիվանագետը։
Նրա խոսքով, Շիրակի մարզում գտնվող 102-րդ ռուսական ռազմաբազայի զինծառայողները անմիջապես միացել են հուշարձանի վերականգնմանը։ Միջադեպի վերաբերյալ համապատասխան գնահատական է տվել նաև Երևանում Ռուսաստանի դեսպանատունը։
«Մենք տեսանք Հայաստանի իրավասու մարմինների հայտարարությունը ենթադրյալ հանցագործի ձերբակալման մասին. դա հրաշալի է։ Մենք հույս ունենք, որ արդարությունը կհաղթի, և որ անօրինական գործողությունները, որոնք մեր երկու երկրներում էլ հանրային մեծ վրդովմունք են առաջացրել, կարժանանան պատշաճ պատժի», - ասել է նա։
Միևնույն ժամանակ, ըստ Զախարովայի, «զարմանալի է, որ Հայաստանի իշխանությունները, հուշարձանի պղծումը վճռականորեն դատապարտելու կամ գոնե որևէ հստակ դիրքորոշում արտահայտելու փոխարեն, բառացիորեն որոշել են լռել»։
Նա նշել է, որ իրենք նկատել ենք Հայաստանի իշխանությունների հետ կապված որոշ լրատվամիջոցների փորձերը՝ միջադեպը ներկայացնելու որպես ռուսական կողմի դիտավորյալ սադրանք. «Դա սուտ է, զզվելի և ակնհայտորեն հորինված քայլ։ Այս ամենը դուրս է առողջ բանականության սահմաններից»։
