Իրանի զինված ուժերը սահմանափակվում են ԱՄՆ-ի կողմից Իրանի տարածքի վրա հարձակումների համար օգտագործվող թիրախների դեմ պատասխան հարվածներով։ Այս մասին հայտարարել է Իսլամական Հանրապետության արտաքին գործերի նախարար Աբբաս Արաղչին։
«Մեր զինված ուժերը ինքնապաշտպանության նպատակով հարվածներ են հասցնում այն թիրախներին, որոնք ԱՄՆ-ին թույլատրվել է օգտագործել քաղաքացիական նավերի վրա հարձակվելու և հրադադարը խախտելու համար», – գրել է նա X-ում: Արաղչին զգուշացրել է, որ Իրանի դեմ ցանկացած ագրեսիա կհանդիպի վճռական պատասխանի, և որ ԱՄՆ-ն ու Իսրայելը չեն կարողանա նոր պատերազմով հասնել այն բանին, ինչին նախկինում չէին կարողացել հասնել պատժամիջոցների և ռազմական գործողությունների միջոցով։
Չորեքշաբթի երեկոյան ԱՄՆ կենտրոնական հրամանատարությունը հայտարարել է, որ հարվածել է իրանական Քեշմ կղզում գտնվող ցամաքային վերահսկողության օբյեկտին՝ Իրանից արձակված հրթիռներն ու անօդաչու թռչող սարքերը որսալուց հետո։ Միևնույն ժամանակ, Իսլամական հեղափոխության պահապանների կորպուսը (ԻՀՊԿ, Իրանի զինված ուժերի էլիտար ստորաբաժանում) հայտնել է Բահրեյնում ԱՄՆ ռազմածովային ուժերի հինգերորդ նավատորմի շտաբի, ինչպես նաև տարածաշրջանային երկրում գտնվող ԱՄՆ ավիաբազայի վրա հրթիռային և անօդաչու թռչող սարքերի հարվածների մասին՝ ի պատասխան Քեշմ կղզում գտնվող ռազմական օբյեկտի վրա ԱՄՆ-ի հարվածների։ Ավելի ուշ ԱՄՆ զինված ուժերը հայտնեցին, որ հաջողությամբ որսացել են մի քանի իրանական անօդաչու թռչող սարքեր, որոնք փորձում էին հարձակվել Քուվեյթում գտնվող ամերիկյան ուժերի վրա։
