Մարմնամարզիկ Արթուր Դավթյանի ցատկը կարող է դառնալ աշխարհի ամենաբարդը։ Այս մասին մամուլի ասուլիս ժամանակ հայտնել է Հայաստանի մարմնամարզության հավաքականի գլխավոր մարզիչ Հակոբ Սերոբյանը։
Հայաստանի հավաքականը օրերս վերադարձել է Խորվաթիայի Օսիյեկ քաղաքից, որտեղ մասնակցել է աշխարհի գավաթի խաղարկության վերջին փուլին։ Ընդհանուր առմամբ թիմը երեք փուլերում նվաճել է 8 մեդալ՝ 4 ոսկի, 3 արծաթ և 1 բրոնզ։
Սերոբյանը նշել է, որ թիմը կարող էր ավելի լավ հանդես գալ, եթե մասնակցեր բոլոր փուլերին։
Ինչպես ավելի վաղ հայտնել ենք՝ Հայաստանի սպորտային մարմնամարզության հավաքականը չի մասնակցել Թուրքիայում անցկացվող Աշխարհի գավաթի երրորդ փուլին, քանի որ չեղարկվել են թռիչքները։
«Եթե մասնակցեինք բոլոր փուլերին, կունենայինք ոչ թե մեկ, այլ երկու կամ երեք բացարձակ գավաթակիր»։
Մարզիչը գոհ է նաև երիտասարդ մարզիկների՝ Մամիկոն Խաչատրյանի և Համլետ Մանուկյանի ելույթներից։
Խոսելով Արթուր Դավթյանի մասին՝ Սերոբյանը ընդգծել է, որ իր համար առաջնայինը մարզիկի առողջությունն է։
«Երբ նա ցատկում է, ես առաջինը հարցնում եմ՝ ոտքդ ինչպես է, մեջքդ, գլուխդ։ Դավթյանը կարող է զգալիորեն բարձրացնել իր ցատկի բարդությունը, սակայն այդ որոշումը կախված է միայն լիարժեք վերականգնումից»։
Բացի այդ, Սերոբյանը կատակել է, որ հավաքականի կազմում նաև դրական իրադարձություն է եղել․ Արթուր Ավետիսյանը ամուսնացել է և անմիջապես հետո հաջող ելույթ ունեցել մրցումներում։
