Իրանի դեմ ԱՄՆ-Իսրայելական գործողության հետևանքով նավթի գների կտրուկ աճը խուճապի մեջ է գցել ԱՄՆ վարչակազմին, հաղորդում է CNN-ը՝ հղում անելով իր աղբյուրներին։
Նրանց տեղեկությունների համաձայն՝ ԱՄՆ նախագահ Դոնալդ Թրամփի խորհրդականները ռազմական գործողությունների առաջին օրերին սպասում էին նավթի գների կարճատև աճ, սակայն շուկայի արձագանքի իրական մասշտաբները նրանց անակնկալի են բերել։ CNN-ը նշում է, որ սկզբում ԱՄՆ վարչակազմը հույս ուներ բենզինի գների անկումը որպես հիմնական փաստարկ օգտագործել Հանրապետական կուսակցության օգտին՝ նոյեմբերին կայանալիք միջանկյալ ընտրություններից առաջ։
Սակայն, երբ նավթի գները գերազանցեցին մեկ բարելի համար 100 դոլարը, պարզ դարձավ, որ ԱՄՆ իշխանությունների կողմից ձեռնարկված քայլերը չեն կարողացել մեղմել երկարատև էներգետիկ ճգնաժամի մասին մտավախությունները։
ԱՄՆ նախագահը նախկինում հայտարարել էր, որ նավթի գները աճել են ավելի քիչ, քան ինքը սպասում էր։ Առևտրի տվյալների համաձայն՝ մարտի 9-ի առավոտյան Լոնդոնի ICE բորսայում Brent տեսակի նավթի 2026 թվականի մայիսի մատակարարման գինը գերազանցել է 119 դոլարը մեկ բարելի համար՝ առաջին անգամ 2022 թվականի հունիսի 17-ից ի վեր։
