Իրանի արտաքին գործերի նախարարության խոսնակ Էսմայիլ Բաղայիի խոսքով՝ որոշ լրատվամիջոցների հաղորդագրությունները Իրանի և Միացյալ Նահանգների միջև միջուկային հարցի շուրջ ենթադրաբար կնքվելիք ժամանակավոր համաձայնագրի մասին իրականությանը չեն համապատասխանում։
«Միացյալ Նահանգների հետ ժամանակավոր համաձայնագրի մասին լրատվամիջոցների հաղորդագրությունները որևէ հիմք չունեն», - նրա խոսքերն է մեջբերել Քաթարի «Ալ Ջազիրա» հեռուստաալիքը։ Իրանի արտաքին գործերի նախարարության խոսնակը նշել է, որ երկու կողմերն այժմ «գաղափարներ ձևակերպելու գործընթացում են»։
Բաղային ընդգծել է, որ Թեհրանը շարունակում է դիվանագիտական ուղիներ փնտրել, քանի դեռ տեսնում է հնարավոր արդյունք։ Փետրվարի 22-ին «Ռոյթերս»-ը, հղում անելով իրանցի պաշտոնյայի, հայտարարել է, որ Թեհրանի և Վաշինգտոնի միջև ժամանակավոր համաձայնագիրը հնարավոր է։
Կիրակի օրը Իրանի արտաքին գործերի նախարար Աբբաս Արաղչին CBS-ի եթերում հայտարարել է, որ փետրվարի 26-ին Ժնևում կարող է հանդիպել ԱՄՆ նախագահի հատուկ դեսպանորդ Սթիվեն Վիտկոֆի հետ։ Օմանի արտաքին գործերի նախարար Բադր ալ-Բուսաիդին ավելի ուշ հաստատել է, որ հինգշաբթի օրը Ժնևում նախատեսվում է Իրան-ԱՄՆ խորհրդակցությունների ևս մեկ փուլ։
