Այսօր առավոտից Քննչական կոմիտե են կանչվել Գերագույն Հոգևոր Խորհրդի անդամները, որոնց որոշմամբ կարգալույծ էր հռչակվել Արման Սարոյանը։ Euromedia24–ի տեղեկություններով՝ ՔԿ-ն նրանց ուղարկել է ծանուցագրեր՝ ներկայանալու 15։00-ին՝ մեղադրյալի կարգավիճակով։ Քննչական կոմիտեն այն հարցին, թե ինչ հիմքով են կանչվել հարցաքննության, պատասխանեցին, որ հարցաքննությունների վերաբերյալ տեղեկություն չեն տրամադրում։
Ներկայում Արման Սարոյանը չի պատրաստվում լքել Մասյացոտնի թեմի առաջնորդարանը, իսկ առաջնորդարանի շենքը հսկվում է ոստիկանության ուժերի կողմից։ Փաստորեն, ՔԿ օրակարգում է հայտնվել Վեհափառ Հայրապետի և ԳՀԽ անդամների Հայաստանից ելքը սահմանափակելու հարցը։
Քննչական կոմիտեի նախաձեռնած քրեական վարույթը՝ կարգալույծ նախկին եպիսկոպոս Արման Սարոյանի նկատմամբ հնարավոր է նպատակ ունենա տապալել սպասվող Եպիսկոպոսաց ժողովը։
Հիշեցնենք, որ կարգալուծության համար հիմք է հանդիսացել այն, որ Արման Սարոյանը վիճարկել է Մասյացոտնի թեմի առաջնորդի պաշտոնից ազատվելու և Մայրավանք վերադառնալու վերաբերյալ Հայրապետական տնօրինությունը, ինչը, ըստ աղբյուրների, խոչընդոտել է թեմի բնականոն գործունեությունը և ստեղծել առիթ ու պայման իշխանության կողմից ներեկեղեցական կյանքին միջամտելու համար։
Նշվում է, որ Գևորգ եպիսկոպոս Սարոյանը կանոնական շեղումներով և կարգազանց գործողություններով խախտել է հնազանդության ուխտը։ Կարգալույծ եկեղեցականն այսուհետ կդասվի աշխարհականների շարքին՝ օգտագործելով Արման Սարոյան ավազանի անունը։
