2026 թվականի մայիսի 23–24-ին Մոսկվայի Four Seasons հյուրանոցում կկայանա հայկական նորակառույցների երկրորդ ցուցահանդես-համաժողովը։ Միջոցառման շրջանակում կներկայացվեն Հայաստանի լավագույն նորակառույց նախագծերը, որոնք հանդես կգան նոր հետաքրքիր առաջարկներով։ Ցուցահանդես-համաժողովը նպատակ ունի մի հարթակում ներկայացնել հայկական անշարժ գույքի լավագույն առաջարկները և բարձրացնել հայկական անշարժ գույքի միջազգային ճանաչելիությունը ։
Գալիք միջոցառման կազմակերպման ընթացքում մանրամասն հաշվարկված են նոր բազմաթիվ կազմակերպչական ու գործնական հարցեր՝ այն առավել արդյունավետ և նպատակային դարձնելու համար։ Այդ պատճառով 2026 թվականի ցուցահանդես-համաժողովը մի շարք առումներով կտարբերվի նախորդից․ թե՛ անցկացման վայրը, թե՛ գովազդային արշավը, և թե՛ կազմակերպչական մոտեցումները կլինեն նոր ձևաչափով։
Ցուցահանդեսի շրջանակում կկազմակերպվի նաև Invest Armenian 2026 տնտեսական համաժողովը, որտեղ կներկայացվեն ներդրումային առաջարկներ ոչ միայն անշարժ գույքի ոլորտից, այլև այլ ոլորտներից, որոնք կարող են հետաքրքիր լինել օտարերկրյա ներդրողների համար։
Բացի այդ, կկայանա նաև «Welcome to Armenia» զբոսաշրջային համաժողովը, որի ընթացքում կներկայացվի Հայաստանի զբոսաշրջային ամբողջ ներուժը։ Նույն օրերին և նույն շենքում նախատեսվում են նաև այլ միջոցառումներ, որոնք կխթանեն մասնակիցների հետաքրքրությունը և կմեծացնեն այցելուների հոսքը դեպի միջոցառումը։
Միջոցառման շրջանակում կազմակերպվող համաժողովները նպատակ ունեն ցույց տալու, որ Հայաստանը ներդրումային լայն հնարավորություններ ունի ոչ միայն անշարժ գույքի ոլորտում։ Դրանք կոչված են օգնելու հայերին ավելի լավ ճանաչել Հայաստանի տնտեսական և ներդրումային դաշտը, բացահայտել տարբեր ոլորտներում առկա հնարավորությունները և վերադառնալ՝ իրենց բիզնեսը զարգացնելու հենց հայրենիքում։
Միջոցառման նախաձեռնող՝ BPA (Business Partners of Armenia) ընկերության նախագահ Վրույր Փենեսյանի խոսքով այս նախաձեռնությունը ևս մեկ ուղերձ է արտերկրի հայերին , որ ժամանակն է Հայաստան գալ ոչ միայն տուն ձեռք բերելու համար, այլ նաև վերադառնալ գաղափարներով, նախաձեռնություններով և ձեռնարկատիրական գործունեությամբ՝ զարգացնելու սեփական հայրենիքը և կառուցելու նրա տնտեսական ապագան:
