Եվրոպացի գործընկերները կարող են մասնակցել Ուկրաինայի և Միացյալ Նահանգների միջև բանակցություններին, որտեղ նախատեսվում է քննարկել խաղաղության ծրագրի մանրամասները։ Այս մասին լրագրողների հետ զրույցում հայտարարել է Վլադիմիր Զելենսկին։
Զելենսկին նշել է, որ Դոնբասից Ուկրաինայի զինված ուժերի դուրսբերումը ռուսական կողմի համար հիմնական պայման է, սակայն Ուկրաինայի համար նման պահանջն անընդունելի է, ուստի, Միացյալ Նահանգները փնտրում է փոխզիջումային լուծում երկու կողմերի համար։
Նա նաև հայտարարել է, որ ուկրաինական պատվիրակությունը վերադարձել է Միացյալ Նահանգներ՝ խաղաղության ծրագրի մանրամասները և անվտանգության երաշխիքները քննարկելու համար։ Կողմերը նախատեսված են հանդիպել «ուրբաթ կամ շաբաթ օրը»։ Զելենսկու խոսքով՝ «եվրոպացիները կարող են ներկա գտնվել բանակցություններին»։
Ավելի վաղ Axios-ը, հղում անելով ԱՄՆ վարչակազմի աղբյուրին, հայտնել էր, որ ԱՄՆ-ի և Ուկրաինայի միջև բանակցությունների նոր փուլ կարող է տեղի ունենալ այս առաջիկա շաբաթավերջին՝ ռազմական մակարդակով և աշխատանքային խմբերի ներկայացուցիչների մասնակցությամբ։
Ինչպես գրել է պորտալը, սպասվում է, որ առաջիկա բանակցությունները տեղի կունենան «Միացյալ Նահանգների որևէ վայրում, հնարավոր է՝ Մայամիում, և կմասնակցեն աշխատանքային խմբեր և զինվորականներ, որոնք կուսումնասիրեն քարտեզները»։
