Մեր հարևան երկրներում պատմությունը անընդհատ կեղծում են, բայց մենք չունենք այն քաղաքականությունը, որ բարձրաձայնենք մեր իրավունքները, պատմական իրողությունները։
Այս մասին այսօր ԱԺ-ում 2025 թ-ի ԿԳՄՍՆ-ի բյուջեի նախագծի քննարկման ընթացքում ասաց ՔՊ-ական պատգամավոր Սերգեյ Բագրատյանը։
«Ստացվում է, որ օտար երկրներում ավելի շատ են փաստում հայկական պետության պատմական գոյությունն ու առաքելությունը, քանի որ հնարավորությունները մեծ են։ Բայց մեր Պատմության թանգարանը, որ հրապարակում է գտնվում, մենք արդյո՞ք դիմել ենք Զբուսաշրջության կոմիտեին, որ անպայման ընդգրկեն ներգնա զբոսաշրջության բոլոր փաթեթներում, որպեսզի պատմության թանգարան մտնելով՝ զբոսաշրջիկը հասկանա, թե ինչ պետության հետ գործ ունի»։
ԿԳՄՍ նախարար Ժաննա Անդրեասյանը պատասխանեց, որ այս տարի մշակույթի զարգացման հիմնադրամ են ձևավորել և պլանավորում են թանգարանների միասնական մարքետիգի իրականացում։
«Ընդ որում, շատ կոնկրետ թիրախներ ենք ուզում ունենալ, ինչքանով է աճելու թանգարանների այցելուների թիվը, ինչպես են բարձրանալու մեր թանգարանների տեսանելիությունը։ Արդեն այդ ուղղությամբ քայլեր են արվելու»։
Նա նաև հիշեցրեց, որ սեպտեմբերից Պատմության թանգարաւոմ ցուցադրվում է Անահիտ աստվածուհու կիսանդրին։
«Միայն այս ցուցադրությունից թանգարանի մուտքերը գերազանցել են 30 միլիոնը։ Ընդ որում՝ մենք ունենք մեծ թվով այցելություններ; Սա ցույց է տալիս, որ նման նախագծերով մեր թանգարանենրը դարձնել շատ ավելի գրավիչ»։
Աղբյուր` Փաստինֆո
