Ճապոնիայի կառավարությունը հույս ունի, որ Չինաստանի հետ հարաբերությունները կվերադառնան կառուցողականության և կայունության վիճակի՝ հաշվի առնելով դրանց ներկայիս վատթարացումը, որը սկսվել է վարչապետ Սանաե Տակաիչիի՝ Թայվանի վերաբերյալ հայտարարություններից և դրանց նկատմամբ Պեկինի կոշտ արձագանքից հետո։
Այս մասին լրագրողներին հայտնել է երկրի իշխող Լիբերալ-դեմոկրատական կուսակցության (ԼԴԿ) քաղաքական խորհրդի նախագահ Տակայուկի Կոբայաշին՝ մեկնաբանելով Չինաստանի արտաքին գործերի նախարարության հայտարարությունը, որը զգուշացրել էր իր քաղաքացիներին չմեկնել Ճապոնիա։
«Մենք պետք է հանգիստ մոտեցում ցուցաբերենք տեղի ունեցողին: Մենք կշարունակենք երկխոսությունը և ջանքերը՝ ճապոնա-չինական հարաբերությունները կառուցողական և կայուն դարձնելու համար», - նրա խոսքերն է մեջբերել «Կիոդո» լրատվական գործակալությունը:
Միաժամանակ, ճապոնական կառավարության աղբյուրը ճապոնական հանրային հեռուստատեսությանը հայտնել է, որ Չինաստանի որոշումը անակնկալ է եղել։ Նա հավելել է, որ Տոկիոն կշարունակի բացատրել Պեկինին, որ Սանաե Տակաիչիի դիտողությունները սադրիչ չեն և համապատասխանում են Թայվանի շուրջ ստեղծված իրավիճակի վերաբերյալ Ճապոնիայի հետևողական դիրքորոշմանը։
