Եվրոպական հանձնաժողովը Հունաստանին լրացուցիչ 103 միլիոն եվրո կհատկացնի ապաստան խնդրողների ընդունման հետ կապված կարիքների համար, հայտարարել է անվտանգության և միգրացիայի հարցերով եվրահանձնակատար Մագնուս Բրունները։
«Հունաստանը նաև կստանա լրացուցիչ 103 միլիոն եվրոյի ֆինանսավորում AMIF-ի (Ապաստանի, միգրացիայի և ինտեգրման հիմնադրամ - խմբ.) շրջանակներում՝ Միգրացիայի և ապաստանի մասին համաձայնագրի իրականացման հետ կապված կարիքները բավարարելու, այդ թվում՝ ընդունելության պայմանների բարելավման համար»։
Եվրահանձնակատարն այս մասին ասել է Եվրախորհրդարանի անդամների հարցերին ի պատասխան, ինչպես հաղորդում է հունական AMNA լրատվական գործակալությունը։
Բրունները նաև նշել է, որ 2015 թվականից ի վեր Եվրամիությունը Հունաստանին հատկացրել է ավելի քան հինգ միլիարդ եվրո՝ միգրացիայի հետ կապված հարցերի համար։
