Ճապոնիայի նոր վարչապետ Սանաե Տակաիչին պատրաստ է բանակցություններ վարել Հյուսիսային Կորեայի առաջնորդ Կիմ Չեն Ընի հետ՝ 1970-ականներին Հյուսիսային Կորեայի հետախուզության կողմից առևանգված քաղաքացիների հարցը լուծելու համար: Այս մասին հայտարարել է կաբինետի գլխավոր քարտուղար Մինորու Կիհարան՝ հերթական մամուլի ասուլիսում:
«Վարչապետ Տակաիչին արտահայտել է իր վճռականությունը՝ բանակցություններ վարելու նախագահ Կիմ Չեն Ընի հետ»,-ասել է նա։Ավելի վաղ Տակաիչին այս հարցին նվիրված միջոցառման ժամանակ հայտարարել էր, որ Տոկիոն արդեն տեղեկացրել է Փհենյանին գագաթնաժողով անցկացնելու իր պատրաստակամության մասին։
Մեկնաբանելով իր խոսքերը՝ Կիհարան ընդգծել է, որ երկրները կապեր են պահպանում տարբեր դիվանագիտական ուղիներով, սակայն չի մանրամասնել, թե ինչ ձևով է ԿԺԴՀ-ն փոխանցել համապատասխան ուղերձը կամ ինչպիսին է եղել դրան արձագանքը՝ վկայակոչելով դիվանագիտական շփումների զգայունությունը։
