Վաղարշապատի ավագանու արտահերթ ընտրություններում «Մայր Հայաստան» կուսակցության ցուցակը գլխավորող Գրիշա Հարությունյանը Ֆեյսբուքի իր էջում գրել է․
«Սիրելի՛ վաղարշապատցիներ, Ինչպես տեղյակ եք, այս ընտրություններում ՔՊ-ի ցուցակի առաջին համար Արգիշտի Մեխակյանն անհիմն մեղադրանք էր հնչեցրել մեր թիմակից, Ծաղկունք համայնքի բազմամյա ղեկավար Դավիթ Կարապետյանի հասցեին։ Դրան հետևեց Դավիթ Կարապետյանի առաջարկն Արգիշտի Մեխակյանին՝ ուղիղ եթերում դեմ առ դեմ բանավեճի գալ իր հետ։
Սակայն վերջինս խուսափում է Դավիթ Կարապետյանի հետ բանավեճից։ Բազմիցս հայտարարել ենք, որ «Մայր Հայաստանի» թիրախը բացառապես ՔՊ-ն է, ինչպես նաև նրա կցորդները։
Հետևաբար, Հանրային հեռուստաընկերությամբ մյուս քաղաքական ուժերի թեկնածուների մասնակցությամբ նախատեսվող ավելի լայն ձևաչափով քննարկումը համարում ենք ոչ արդյունավետ։ Նախընտրական մեծ բանավեճի այդ ձևաչափին մասնակցելը նաև հնարավորություն չի տալու լիարժեքորեն ներկայացնել մեր ծրագրային դրույթները և գաղափարները։
Դրանք մեր սիրելի վաղարշապատցիներին կներկայացնենք ամենօրյա ռեժիմով իրենց հետ անձնապես շփվելով, բակային հանդիպումներով և նախընտրական քարոզարշավի այլ՝ առավել արդյունավետ ձևաչափերով։
Միացե՛ք, որ փոխենք»։
