ԱՄՆ նախագահ Դոնալդ Թրամփը պլանավորում է այցելել Կորեայի Հանրապետություն, սակայն կարող է բաց թողնել Կյոնջուում կայանալիք Ասիա-խաղաղօվկիանոսյան տնտեսական համագործակցության գագաթնաժողովը, հաղորդում է Yonhap լրատվական գործակալությունը՝ հղում անելով Հարավային Կորեայի կառավարական շրջանակներում իր աղբյուրներին։
Քննարկումներ են ընթանում այն տարբերակի շուրջ, որի դեպքում Թրամփը կարող է հանդիպումներ ունենալ Հարավային Կորեայի նախագահ Լի Չժե Մյունի և Չինաստանի նախագահ Սի Ցզինպինի հետ, բայց չմասնակցել Կյոնջուում հոկտեմբերի 31-ից նոյեմբերի 1-ը կայանալիք Ասիա-խաղաղօվկիանոսյան տնտեսական համագործակցության գագաթնաժողովին։
Գործակալության տվյալներով՝ ԱՄՆ նախագահը, ինչպես սպասվում է, կմասնակցի Կուալա Լումպուրում հոկտեմբերի 26-28-ը կայանալիք ԱՍԵԱՆ-ի գագաթնաժողովին։ Այնուհետև Թրամփը կմեկնի Ճապոնիա։ Ճապոնական լրատվամիջոցների փոխանցմամբ՝ ԱՄՆ-ի և Ճապոնիայի առաջնորդների հանդիպումը, հավանաբար, կկայանա հոկտեմբերի 28-ին։ Սեուլը սպասում է, որ Թրամփը Հարավային Կորեա կժամանի հոկտեմբերի 29-ին։
«Մեզ հայտնի է, որ Թրամփը երկիր կժամանի հոկտեմբերի 29-ին և կայցելի Կյոնջու։ Սակայն ժամանակացույցը դեռևս վերջնականապես որոշված չէ. Կորեայի Հանրապետության և Միացյալ Նահանգների միջև խորհրդակցություններ են ընթանում», - գործակալությանը հայտնել է իշխող կուսակցության աղբյուրը։
