Թուրքիայի արտաքին գործերի նախարարությունը կոշտ հայտարարությամբ դատապարտել է Իսրայելի գործողությունը իջազգային ջրերում, որի թիրախում հայտնվել է Գազայի բնակչությանը մարդասիրական օգնություն հասցնող «Global Sumud» նավատորմը։ Հաղորդագրության մեջ նշվում է, որ հարձակումը «մեղավոր ու անմեղ չտարբերող, խաղաղամետ քաղաքացիական անձանց կյանքը վտանգող ահաբեկչական գործողություն է»։
Նախարարությունը ընդգծել է, որ Իսրայելի գործողությունները կոպտորեն խախտում են միջազգային իրավունքը և վկայում վարչապետ Բենյամին Նեթանյահուի կառավարության «ֆաշիստական ու միլիտարիստական» քաղաքականության մասին։ Հայտարարության մեջ շեշտվում է, որ Իսրայելի բռնաճնշումները միայն պաղեստինցիներով չեն սահմանափակվում, այլ ուղղված են նաև այն մարդկանց դեմ, ովքեր փորձում են հակազդել այդ անօրինական քաղաքականությանը։
Թուրքիան տեղեկացրել է, որ գործադրում է բոլոր դիվանագիտական միջոցները՝ իր քաղաքացիների և նավատորմի մյուս մասնակիցների ազատ արձակման համար և պատրաստվում է քայլեր ձեռնարկել իրավական դաշտում՝ հարձակման պատասխանատուներին պատասխանատվության ենթարկելու նպատակով։
