Հինգշաբթի առավոտյան իսրայելական բանակը խլել է Նիդեռլանդների դրոշի ներքո նավարկող «Մուհամմադ Բհար» նավը, որը «Սումուդ» մարդասիրական նավատորմի մաս էր կազմում և ուղևորվում էր դեպի Գազայի ափեր։ Այս մասին հայտնել է NU.nl լրատվական կայքը՝ հղում անելով գործողության համակարգողներին։
Նրանց տեղեկությունների համաձայն՝ նավի վրա եղել է 16 հոլանդացի քաղաքացի, որոնցից վեցը ձերբակալվել են։ Համակարգողները նաև պարզաբանել են, որ ձերբակալվածներից մի քանիսին հաջողվել է իրենց բջջային հեռախոսները ծովը նետել՝ դրանք իսրայելական ուժերի ձեռքը չընկնելու համար։
Ավելի վաղ Միջազգային առաքելության տեղեկատվական կոմիտեն հայտնել էր, որ իսրայելական ուժերը «Սումուդ» նավատորմից խլել են ինը նավ և ձերբակալել 70 ակտիվիստի։
«Սումուդ» նավատորմը (արաբերենից թարգմանաբար նշանակում է «անսասանություն») սեպտեմբերի կեսերին Թունիսի ափերից մեկնեց դեպի Գազա։ Այն բաղկացած էր տարբեր երկրների պատկանող ավելի քան 40 նավերից, որոնցից մեկի վրա էր գտնվում շվեդ իրավապաշտպան Գրետա Թունբերգը։
