ՆԱՏՕ-ն սեպտեմբերի 12-ին կտեղեկացնի դաշինքի արևելյան թևի վերաբերյալ կայացված որոշումների մասին՝ կապված Լեհաստանում անօդաչու թռչող սարքի միջադեպի հետ։ Այս մասին լրագրողներին հայտնել է Լեհաստանի վարչապետ Դոնալդ Տուսկը։
«Ես ՆԱՏՕ-ի գլխավոր քարտուղար Մարկ Ռյուտեից տեղեկատվություն ստացա, որ սեպտեմբերի 12-ին կիմանանք, թե ինչպիսին կլինեն ՆԱՏՕ-ի հաջորդ քայլերը արևելյան թևի հետ կապված՝ տեղի ունեցածից հետո», - ասել է Տուսկը TVP Info-ի կողմից հեռարձակված մամուլի ասուլիսում։
Անհայտ ծագման անօդաչու թռչող սարքերի կողմից Լեհաստանի օդային տարածքը խախտելու կապակցությամբ ՆԱՏՕ-ն, Վարշավայի խնդրանքով, կիրառեց Հյուսիսատլանտյան պայմանագրի 4-րդ հոդվածը և սկսեց համապատասխան խորհրդակցություններ: Բացի այդ, Լեհաստանի ղեկավարությունը՝ նախագահը, վարչապետը, Արտաքին գործերի և Պաշտպանության նախարարությունների ղեկավարները, բանակցություններ վարեցին Արևմուտքի մի շարք դաշնակիցների հետ:
Սեպտեմբերի 10-ի առավոտյան լեհական բանակի օպերատիվ հրամանատարությունը հայտարարեց երկրի օդային տարածքը խախտած մի քանի անօդաչու թռչող սարքերի ոչնչացման մասին։
