Առավոտյան պատրաստվում էի գալ ԱԺ նիստին, շտապում էի, ցավոք սրտի, այդ դեպքի պատճառով ուշացա և չհասցրի գրանցվել ելույթի համար։ Հայատնաբերեցի, որ մեքենայիս կողային հայելիները բացակայում են։ Բայց գիտեմ, որ սա համատարած բնույթ է կրում։ Այս մասին լրագրողների հետ զրույցում ասել է ԱԺ «Հայաստան» խմբակցության պատգամավոր Ագնեսա Խամոյանը։
Նա նշեց, որ բազմաթիվ նամակներ է ստացել քաղաքացիներից, որոնք բախվել են նույն խնդրին․ «Քաղաքացիներն ուղարկել են Տելեգրամում իրենց նամակագրությունները գողերի հետ, և պետք է արձանագրել, որ բավականին ջերմ ու մտերմիկ միջավայրում են տեղի ունենում այդ զրույցները, շատ բարեխիղճ են մեր գողերը փաստորեն, անգամ սակարկում են գները, որոնք սկսվում են մի քանի հարյուր հազար դրամից մինչև մի քանի տաս հազար դրամ, և վերջում գողերը գողացված մեքենաների տերերի հետ գալիս են համաձայնության»,– պատմեց պատգամավորը։
Նրա խոսքով՝ քաղաքացիները ոստիկանություն չեն դիմում, քանի որ գողության դեպքերը հիմնականում չեն բացահայտվում․ «Ինքս էլ չեմ պատրաստվում դիմել ոստիկանություն, քանի որ վստահ եմ՝ չի բացահայտվելու այդ գողության դեպքը և ժամանակ էլ չունեմ այդ քաշքշուկի մեջ ընկելու համար»,– ասաց Խամոյանը։
