Վենեսուելայի իշխող Միացյալ սոցիալիստական կուսակցությունը (PSUV) պետք է դիմի զինված պայքարի Միացյալ Նահանգների կողմից ագրեսիայի դեպքում։ Այս մասին հայտարարել է Բոլիվարյան Հանրապետության նախագահ Նիկոլաս Մադուրոն PSUV-ի և կուսակցության երիտասարդական թևի համագումարում՝ Venezolana de Television հեռուստաալիքի եթերում։
«Ամերիկյան իմպերիալիզմի կողմից Վենեսուելայի դեմ ագրեսիայի դեպքում իշխող PSUV կուսակցությունը, որը միավորում է հեղափոխության քաղաքական, սոցիալական և մշակութային շրջանակները, պետք է անհապաղ անցնի պայքարի անզեն ձևից զինվածի», - ասել է Մադուրոն։
Նա ընդգծել է, որ Վենեսուելայի ժողովուրդը երբեք չի համաձայնի կապիտուլյացիայի և հետևողական պայքար կծավալի ինքնիշխանության, անկախության և պետության զարգացման իրավունքի համար։
Մադուրոն հիշեցրել է Վենեսուելայի ակտիվ պաշտպանության՝ «Անկախություն 200. ակտիվ դիմադրություն և մշտական հարձակողական գործողություն» ծրագրի իրականացումը, ինչպես նաև զինված ուժերի և ժողովրդական աշխարհազորայինների օպերատիվ միջոցառումների տեղակայումը ամբողջ երկրում համապարփակ պաշտպանության համար։
