Առնվազն 7557 կալանավոր է փախել Նեպալի բանտերից սեպտեմբերի 9-ից երկրում սկսված համատարած զանգվածային անկարգությունների ընթացքում: Այս մասին հաղորդում է My Republica պարբերականը՝ հղում անելով Նեպալի ներքին գործերի նախարարության աղբյուրի:
Լրատվամիջոցի տվյալներով՝ փախուստի դիմած կալանավորների մասին հաղորդագրություններն ստացվել են 13 ուղղիչ հաստատություններից: Իրավապահ մարմինների և զինված ուժերի ստորաբաժանումները տեղակայվել են ամբողջ երկրում՝ հանցագործներին վերադարձնելու համար: Իշխանությունները քաղաքացիներին կոչ են արել զգուշություն պահպանել և հայտնել ցանկացած կասկածելի իրավիճակի մասին:
Իրավիճակը Նեպալում սրվել էր այն բանից հետո, երբ կառավարությունն արգելել էր սոցիալական 26 հարթակներ, քանի որ նրանք չէին գրանցվել՝ իշխանությունների պահանջին համապատասխան։ Ցույցերի ֆոնին սոցցանցերի արգելքը չեղարկվել էր, սակայն բողոքի ակցիաները շարունակվել էին, և երկրի վարչապետը հրաժարական է տվել։
