Արցախի թեմը երախտագիտություն է հայտնել «ԴԻԱԼՈԳ» հասարակական կազմակերպության նախագահ պարոն Յուրի Նավոյանին՝ իր հայրենանվեր ու ազգանպաստ գործունեության համար․
«Արցախի թեմի և Թեմական խորհրդի անունից մեր օրհնությունն ենք բերում և միաժամանակ խորին երախտագիտությունը հայտնում «ԴԻԱԼՈԳ» հասարակական կազմակերպության նախագահ պարոն Յուրի Նավոյանին՝ իր հայրենանվեր ու ազգանպաստ գործունեության համար։ Երկար տարիներ թե պետական, թե հանրային կյանքում նա, իրավամբ, կարևոր ծառայություններ է մատուցել և շարունակում է մատուցել հայրենիքին ու մեր ժողովրդին: 2017 թվականին, մի խումբ համախոհների հետ հիմնադրելով «ԴԻԱԼՈԳ» հասարակական կազմակերպությունը՝ նրա գործունեության հիմքում դրել է երկխոսության միջոցով սոցիալական և միջպետական խնդիրների լուծման սկզբունքը։ Իսկ վերջին տարիներին, հատկապես արցախահայության բռնի տեղահանությունից հետո, «ԴԻԱԼՈԳ» կազմակերպության գործունեության առանցքում են ներառվել նաև արցախահայության հիմնախնդիրները, նախաձեռնվել ու իրականացվել բազմաթիվ ու բազմաբնույթ ծրագրեր:
Նրա անմիջական աջակցությամբ Երևանում իր գործունեությունն է սկսել Հայ Առաքելական Սուրբ Եկեղեցու Արցախի թեմի գրասենյակը։ Թեմի հետ համատեղ ջանքերով սկիզբ է դրվել Արցախի պատմամշակութային ժառանգությանը նվիրված մատենաշարի, որի առաջնեկը դարձավ «Արցախ․ վտանգված ժառանգություն» խորագրով եռալեզու պատկերագիրքը։
Յուրի Նավոյանի խորքային ու ազգանպաստ գաղափարները գործնական ծրագրերի վերածելու կոնկրետ ձեռնարկները անմիջապես արժանանում են հանրության լայն շրջանների համակրանքին: Բավական է նշել վերջին շրջանում նրա կողմից նախաձեռնած ու հրատարակած գրքերի շարքը, հասկանալու համար թե գաղափարաքարոզչական ինչպիսի արդյունավետ ու նպատակասլաց աշխատանքներ են կատարվում ու մատուցվում հանրությանը: «Գրքային դիվանագիտություն» այս տերմինը և բուն գաղափարը, որ շրջանառության մեջ է դրվել նրա կողմից, թերևս լավագույն բնութագրությունն է իրականացվող մեծածավալ աշխատանքների: «ԴԻԱԼՈԳ» կազմակերպության հովանավորությամբ հրատարակվել են նաև արցախցի գրողների գրքեր՝ նպաստելով մեր մշակութային ժառանգության պահպանմանն ու զարգացմանը։
Կարևոր նախաձեռնություններից է նաև «Արցախ» ջազ նվագախմբի վերակենդանացումը։ Ծրագրի բուն նպատակը Արցախից բռնագաղթած տաղանդավոր երիտասարդների համար իրական հնարավորություններ ստեղծելն է իրենց ունակությունները դրսևորելու և ծառայեցնելու հանուն մեծ մշակույթի: Վերակազմավորված ՛՛Արցախի ջազ՛՛ նվագախումբը շատ կարճ ժամանակաընթացքում հենց «ԴԻԱԼՈԳ» կազմակերպության հովանավորությամբ կարողացավ համերգներ ունենալ Երևանում և Մոսկվայում՝ արժանանալով մեծ ընդունելության ու բարձր գնահատանքի։
Ուրախությամբ ենք ուզում նշել նաև Վահրամ Փափազյանի անվան դրամատիկական թատրոնի վերածննդին միտված ձեռնարկները։ «Գալյա Նովենց» թատերական դպրոցը «ԴԻԱԼՈԳ» կազմակերպության հետ համատեղ մեկնարկում է երկամյա անվճար դերասանական կրթական ծրագիր՝ նախատեսված արցախցի երիտասարդների համար։ Ծրագրի նպատակն է՝ հնարավորություն ընձեռնել երիտասարդներին՝ մասնագիտական կրթություն ստանալու և բացահայտելու իրենց ստեղծագործական ներուժը։ Ծրագրի շրջանակներում 15 արցախցի երիտասարդներ անվճար կրթություն կստանան վերոնշյալ դպրոցում:
Արցախի թեմը բարձր է գնահատում պարոն Յուրի Նավոյանի հայրենասիրական ու եկեղեցասիրական գործունեությունը՝ ուղղված ընդհանրապես հայ մշակութային կյանքի հզորացմանը և, մասնավորապես, Արցախի մշակույթի պահպանմանը։ Նրա նախաձեռնությունները վկայում են ազգային արժեքների հանդեպ հոգածության և հայրենիքին նվիրվածության մասին։
Արցախի թեմի առաջնորդ
