Ո՞վ է «Արմավիր Գարդենի» սեփականատերը, որ ՍԱՏՄ-ն 12 թունավորման դեպքից հետո անգամ չի դադարեցրել ռեստորանի գործունեությունը։
Սեպտեմբերի 8-ին Արմավիրի բժշկական կենտրոն են տեղափոխվել քաղաքացիներ սննդային թունավորմամբ։ Սկզբում հիվանդանոց են տեղափոխել երկու քաղաքացի, ավելի ուշ նրանց թիվը հասել է 12-ի։ Այս պահին նրանցից 9-ը շարունակում են բուժօգնություն ստանալ Արմավիրի բժշկական կենտրոնում։
Euromedia24-ի հետ զրույցում ՍԱՏՄ-ից փոխանցեցին, որ ռեստորանում նմուշառումներ են կատարվել և ուղարկվել լաբորատոր փորձաքննության․
«Մինչև արդյունքները չլինեն, մենք չենք կարող որևէ կանխարգելիչ միջոցառում իրականացնել»։
Այս պահին «Արմավիր Գարդենը» շարունակում է աշխատել։ ՍԱՏՄ-ից պարզաբանում են, որ լաբորատոր արդյունքները ստանալու համար անհրաժեշտ է որոշ ժամանակ, և մինչև այդ տնտեսավարողին գործունեությունը դադարեցնել չեն կարող։ «Եթե հետագայում պարզվի, որ խնդիր չի եղել, ապա ռեստորանի աշխատանքը 5-7 օրով դադարեցնելը կլինի անհիմն քայլ», – ընդգծեցին կառույցից։
Միևնույն ժամանակ, տեսչական մարմնում նշում են, որ հնարավոր է՝ քաղաքացիները մատնանշեն այն ուտեստը, որը տվյալ պահին այլևս չլինի ռեստորանում, և նմուշ վերցնելը պարզապես չհաջողվի։
Այսպիսով՝ «Արմավիր Գարդենը» շարունակում է գործել, և այդ ընթացքում ՍԱՏՄ-ն չի կարող պահանջել դադարեցնել աշխատանքը։ Իսկ գլխավոր
հարցը մնում է օդում․ եթե նույնիսկ նոր թունավորման դեպքերի վտանգ կա, ինչու՞ է ռեստորանը շարունակում հաճախորդներ ընդունել։
Հիշեցնենք , որ Բոլոր տուժածները նույն օրը սնվել էին Արմավիր քաղաքի «Արմավիր Գարդեն» ռեստորանում։
Նրանցից ոմանք պատմել են, որ օգտագործել են սնկապուր, մյուսները՝ հավով աղցան, հավով պիցցա և հավի թևիկներ։ Ըստ տուժածների՝ հենց այդ ուտեստներն են պատճառ դարձել ինքնազգացողության վատացման։
