Ռուսաստանը սեպտեմբերի 7-ի լույս գիշերը իրականացրել է պատերազմի ընթացքում Ուկրաինայի դեմ ամենախոշոր օդային հարձակումը՝ հարվածելով Կիևի կենտրոնում գտնվող կառավարության գլխավոր շենքին։ Հարձակման հետևանքով զոհվել է առնվազն չորս մարդ, այդ թվում՝ մանկահասակ երեխա, և տասնյակ մարդիկ վիրավորվել են։
Սա առաջին դեպքն է պատերազմի ընթացքում, երբ ռուսական հրթիռներն ու ԱԹՍ-ները վնասել են Ուկրաինայի կառավարության շենքը։ Ուկրաինայի նախագահ Վլադիմիր Զելենսկին հայտարարել է, որ հարձակումներն ընդգրկել են Զապորոժյեն, Կրիվոյ Ռոգը, Օդեսան և մի շարք շրջաններ։
Նա կրկին կոչ է արել դաշնակիցներին ուժեղացնել երկրի հակաօդային պաշտպանությունը։ Կիևում վնասվել են բնակելի տներ, մի քանի թաղամասերում փլուզումներ և հրդեհներ են գրանցվել, օդային տագնապները տևել են ավելի քան 11 ժամ։ Ռուսական կողմը պնդում է, որ հարվածների թիրախ են եղել ռազմական արտադրական օբյեկտներն ու ենթակառուցվածքները։
Ուկրաինական կողմը հայտնել է, որ հարձակման ընթացքում կիրառվել է 805 ԱԹՍ և 13 հրթիռ՝ ինչը աննախադեպ թիվ է 2022-ից սկսված լայնածավալ պատերազմի ընթացքում։ Միևնույն ժամանակ, ուկրաինական բանակը հարվածել է Ռուսաստանի Բրյանսկի շրջանում գտնվող «Դրուժբա» նավթամուղին՝ վնաս հասցնելով երկրի էներգետիկ համակարգին։ Արևմտյան դաշնակիցները խստորեն դատապարտել են հարձակումը, իսկ ԱՄՆ նախագահ Դոնալդ Թրամփը հայտարարել է, որ պատրաստ է քննարկել Ռուսաստանի դեմ պատժամիջոցների երկրորդ փուլի գործարկումը։
