Ռուսաստանի արտաքին գործերի նախարար Սերգեյ Լավրովը հայտարարել է, որ Իսրայելի անվտանգությունն անհնար է ապահովել առանց Պաղեստինի պետություն ունենալու իրավունքը հարգելու։
«Մեր գնահատմամբ՝ դժվար է ապահովել Իսրայելի անվտանգությունը ոչ միայն պաղեստինցիների անվտանգությունը խախտելով՝ սա անվտանգության անբաժանելիության հարց է, այլև ապահովել Իսրայելի անվտանգությունը՝ վերացնելով պաղեստինցիների սեփական պետություն ունենալու իրավունքը»,- ասել է Ռուսաստանի արտաքին գործերի նախարարության ղեկավարը՝ ելույթ ունենալով ՄԳԻՄՕ-ի ուսանողների և դասախոսների առջև։
«Մենք՝ մեր իսրայելցի գործընկերների հետ, վաղուց, նույնիսկ ավելի լավ ժամանակներում, ներկայիս արյունալի իրադարձություններից առաջ, խոսել և պաշտպանել ենք այն միտքը, որ առանց պաղեստինյան պետության ստեղծման, պաղեստինցիների նկատմամբ իրականացված անարդարության զգացողության վրա հիմնված ծայրահեղականությունը կխթանվի», - բացատրել է Լավրովը։
Նախարարը վստահեցրել է, որ Մոսկվան միշտ հասկացել է Իսրայելի մտահոգությունները իր անվտանգության վերաբերյալ։
«Առանց պաղեստինյան պետության տարածաշրջանում կայունությունը հազիվ թե հնարավոր լինի, և նրանք չեն ցանկանում այն ստեղծել, քանի որ Իսրայելն ասում է, որ դա կսպառնա իր անվտանգությանը»,-եզրափակել է արտգործնախարարը։
