Թուրքիան Սիրիայի նոր իշխանություններին կտրամադրի ամեն հնարավոր աջակցություն՝ իր տարածքային ամբողջականությունը պաշտպանելու հարցում, հաղորդում է TRT Haber-ը՝ հղում անելով հանրապետության պաշտպանության նախարարության աղբյուրներին։
«Թուրքիան կտրամադրի Սիրիայի կառավարությանը լիակատար աջակցություն՝ նրա միասնությունն ու տարածքային ամբողջականությունը պաշտպանելու հարցում», - ասել են աղբյուրները։ Նրանք նշել են, որ «Սիրիայում կայունությունը ուղղակիորեն կապված է Թուրքիայի անվտանգության հետ, ուստի այս ուղղությամբ ձեռնարկված յուրաքանչյուր քայլ նպաստում է տարածաշրջանում խաղաղության ապահովմանը»։
Անկարան հիշեցրել է երկու երկրների ռազմական գերատեսչությունների միջև օգոստոսի 13-ին ստորագրված հուշագիրը, որի համաձայն՝ Թուրքիան օգնություն կցուցաբերի Սիրիայի նոր իշխանություններին կառավարական բանակի համար անձնակազմի պատրաստման, ինչպես նաև ռազմական տեխնիկայի և զենքի մատակարարման հարցում։
«Ստորագրված հուշագրի իրականացման շրջանակներում Թուրքիան անհրաժեշտ ներդրում կունենա Սիրիայում նախատեսված ուսումնական կենտրոնների ստեղծման գործում՝ հաշվի առնելով իր կարիքները», - հավելել են աղբյուրները։
Թուրքիայի ռազմական գերատեսչությունը նաև հայտնել է, որ Անկարան հույս ունի, որ Սիրիայում մեկ կենտրոնից կառավարման մոդելը կապահովի արաբական հանրապետության տարածքային ամբողջականությունն ու միասնությունը և «կկանխի անջատողական տարրերի գործունեությունը»։
