Ալիևը բողոքել է Ռուսաստանից

Ռուսական ուժերի կողմից ադրբեջանական քաղաքացիական ինքնաթիռի խոցումը և ռուս պաշտոնյաների արձագանքը միջադեպին մեծ հիասթափություն և դժգոհություն են առաջացրել Ադրբեջանում։

Ըստ APA-ի, այս մասին հայտարարել է Ադրբեջանի նախագահ Իլհամ Ալիևը «Ալ Արաբիա» հեռուստաալիքին տված հարցազրույցում։

Նա նաև հիշել է, որ Արցախյան երկրորդ պատերազմի ժամանակ՝ նոյեմբերի 9-ին, Ադրբեջանը պատահաբար խփել էր ռուսական ուղղաթիռ, որը «մոտենում էր Ադրբեջանի սահմանին, որտեղ այն չպետք է լիներ»։

«Որովհետև 30 տարի շարունակ ռուսական ուղղաթիռները երբեք չեն մոտեցել Ադրբեջանի սահմանին Հայաստանի տարածքից։ Այն թռչում էր Հայաստանի կողմից։ Նրանց համար, ովքեր խփել էին այն, ակնհայտ էր, որ հայկական ուղղաթիռը պատրաստվում էր ներթափանցել մեր տարածք, և նրանք խփել էին այն։ Անմիջապես, նույն օրը, ես զանգահարեցի Ռուսաստանի նախագահին և ներողություն խնդրեցի։

Մենք անմիջապես փոխհատուցում վճարեցինք զոհված օդաչուների ընտանիքներին և Պաշտպանության նախարարությանը։ Մենք հետաքննություն սկսեցինք, և այս ողբերգական սխալը թույլ տվածները պատասխանատվության ենթարկվեցին։ Մենք նման բան Ռուսաստանից չենք տեսել։ Նոյեմբերի 9-ի այդ ողբերգական իրադարձությունը և մեր վարքագիծը մեզ հիմք են տալիս ակնկալելու նույն վերաբերմունքը Ադրբեջանի նկատմամբ, քանի որ երկու երկրները միմյանց բարեկամներ են անվանում։ Բայց դա մեծ անակնկալ էր։ Եվ նրանք դեռևս չեն ասում, թե ինչ է պատահել։ Այսպիսով, իհարկե, սա շատ լուրջ իրավիճակ է մեր երկկողմ հարաբերություններում։ Բայց մենք չէինք ուզում, որ այս հարաբերությունները վատթարանան։ Այո, մեր ժողովուրդը հիասթափված էր, զայրացած, վրդովված։ Մենք սպասում էինք, որ վաղ թե ուշ հետաքննությունը կավարտվի։

Բայց հետո սկսվեցին Ռուսաստանում ադրբեջանցիների վրա այս անհիմն հարձակումները։ Երկու մարդ տանջվել և սպանվել է։ Եվ ավելի ուշ պաշտոնական տեղեկատվությունը ասում էր, թե նրանք մահացել են սրտի կաթվածից։ Նույնիսկ եթե նրանք 20 տարի առաջ հանցագործություն են կատարել, ինչպես ասում են, նրանք մարդիկ են։ Նրանց հետ չի կարելի այդպես վարվել։ Ի՞նչ վերաբերմունք է սա։ Նրանց թվում էին Ադրբեջանի քաղաքացիներ և Ռուսաստանի քաղաքացիներ՝ ադրբեջանական ծագմամբ։ Սա աննախադեպ գործողություն էր մեր ժողովրդի դեմ։ Մենք պատասխանատու չենք հարաբերությունների վատթարացման համար։ Մենք կառուցողական ենք արձագանքում և օրենքով, բայց երբեք չենք հանդուրժի մեր նկատմամբ ագրեսիայի կամ անհարգալից վերաբերմունքի որևէ նշան կամ դրսևորում», - նշել է պետության ղեկավարը։

Ալիևը նշել է, որ Ռուսաստանը Հայաստանում մի քանի հազար զինծառայողով ռազմաբազա ունի։

Նրա խոսքով՝ Իրանի և Թուրքիայի հետ Հայաստանի սահմանները հսկում են ռուս սահմանապահները. «Ադրբեջանի տարածքում ոչ մի ռուս զինվոր չկա։ Ես չգիտեմ, թե ինչ կարող է պատահել Հայաստանում։ Բայց ես չեմ ուզում մտածել նման բացասական ելքի մասին»։ Ալիևը նաև աջակցություն է հայտնել Ուկրաինայի տարածքային ամբողջականությանը, Ռուսաստանին մեղադրել ներխուժման մեջ։

«Եվ կրկին, վերադառնալով ադրբեջանա-ռուսական հարաբերությունների վերաբերյալ քննարկվածին, մենք աջակցել ենք Ուկրաինայի տարածքային ամբողջականությանը Ռուսաստանի կողմից Ուկրաինա ներխուժման առաջին օրերից ի վեր և շարունակում ենք աջակցել դրան։ Եվ, իհարկե, Սիրիայի միասնությունն ու տարածքային ամբողջականությունը ցանկացած հարաբերությունների ամենակարևոր պայմանն են։ Եվ ոչ միայն իրավական միասնությունն ու սահմանային վերահսկողությունը, այլև ֆիզիկական միասնությունը։ Երկիրը պետք է ունենա կենտրոնացված համակարգ կամ, առնվազն, գործող քաղաքական ինստիտուտներով համակարգ։ Մենք վճռականորեն դեմ ենք անջատողականության ցանկացած ձևի, լինի դա Ղարաբաղում, Սիրիայում, թե աշխարհի որևէ այլ վայրում», - նշել է պետության ղեկավարը։