ԵԱՀԿ-ում նախագահող Ֆինլանդիան սկսել է անհրաժեշտ գործողությունները՝ ի պատասխան Ադրբեջանի և Հայաստանի համատեղ կոչի՝ լուծարել Մինսկի խումբը։
Այս մասին ադրբեջանական լրատվամիջոցներին հայտնել է ֆին դիվանագետ Թոնի Սանդելը, որը երկրի արտաքին գործերի նախարարությունում ստեղծված Ֆինլանդիայի ԵԱՀԿ նախագահության 2025 թվականի աշխատանքային խմբի ղեկավարի տեղակալն է։
«Որպես Եվրոպայում անվտանգության և համագործակցության կազմակերպության (ԵԱՀԿ) նախագահող՝ Ֆինլանդիան ողջունում է օգոստոսի 8-ին Վաշինգտոնում ստորագրված համաձայնագրերը», - նշել է նախարարությունը։
Այս համաձայնագրերը կարևոր քայլ են Ադրբեջանի և Հայաստանի միջև հարաբերությունների կարգավորման և տարածաշրջանում երկարատև խաղաղության հասնելու ուղղությամբ, ավելացրել է Սանդելը։
Նա ասել է, որ Ֆինլանդիան սկսել է երկու երկրների համատեղ կոչին արձագանքելու գործընթացը, լրացուցիչ տեղեկատվություն կտրամադրվի ավելի ուշ։
Ավելի վաղ Փարիզում գտնվող ԵԱՀԿ կենտրոնակայանից հայտնել էին, որ գործող նախագահը խորհրդակցություններ կանցկացնի կազմակերպության անդամ երկրների հետ։ Ինչպես հայտնի է, Ֆինլանդիան նաև Մինսկի խմբի անդամ է։
Ադրբեջանը և Հայաստանը համատեղ դիմել են ԵԱՀԿ-ին՝ Մինսկի խումբը լուծարելու կոչով։ Օգոստոսի 8-ին երկու երկրի արտաքին գործերի նախարարները ստորագրել են այս փաստաթուղթը Վաշինգտոնում՝ Ադրբեջանի, Հայաստանի և ԱՄՆ ղեկավարների ներկայությամբ:
ԵԱՀԿ Մինսկի խմբի լուծարումը Ադրբեջանի համար Հայաստանի հետ խաղաղության պայմանագիր ստորագրելու երկու կարևոր պայմաններից մեկն էր։
Հիշեցնենք՝ ԵԱՀԿ Մինսկի խումբը ստեղծվել է 1992 թվականին՝ ղարաբաղյան հակամարտության խաղաղ կարգավորումը խթանելու համար: 2020 թվականի աշնանը պատերազմից հետո, որն ավարտվեց Ադրբեջանի հաղթանակով, պաշտոնական Բաքուն բազմիցս հայտարարել է, որ ղարաբաղյան հակամարտությունը լուծված է, ինչը նշանակում է, որ ԵԱՀԿ Մինսկի խմբի և դրա ինստիտուտների կարիքը չկա։
Երեք համանախագահ երկրներից՝ ԱՄՆ-ից, Ռուսաստանից և Ֆրանսիայից, ինչպես նաև հենց Ֆինլանդիայից բացի, խմբում ընդգրկված են Բելառուսը, Գերմանիան, Իտալիան, Թուրքիան, Շվեդիան, Ադրբեջանը և Հայաստանը։
