Իրանի իշխանությունները Միջազգային քրեական դատարանին (ՄՔԴ) կհանձնեն Իրան-Իսրայել հակամարտության թեժ փուլում Իսրայելի կողմից թույլ տրված մարդու իրավունքների կոպիտ խախտումների ապացույցները, հայտարարել է Իրանի Կարմիր մահիկի ընկերության փոխղեկավար Ռազիե Ալիշավանդին։
«Մեր կազմակերպությունը մարդու իրավունքների կոպիտ խախտումների վերաբերյալ ապացույցներ կուղարկի Միջազգային քրեական դատարան, և մենք կհամագործակցենք այս հարցի շուրջ այլ միջազգային մարմինների հետ», - նրա խոսքերն է մեջբերում IRNA-ն։
Իրանի Կարմիր մահիկի ընկերության տվյալներով՝ Իրանի և Իսրայելի միջև 12-օրյա զինված հակամարտության ընթացքում զոհվել է 102 կին և 38 երեխա, իսկ հարձակման են ենթարկվել 10 շտապօգնության մեքենա և 8 բժշկական հաստատություն։
Ավելի վաղ Իսլամական Հանրապետության իշխանությունները հայտնել էին, որ Իրանի տարածքում Իսրայելի կողմից հասցված հարվածների զոհերի թիվը հասել է 1060-ի։
