Էստոնիան պատրաստ է իր տարածքում ընդունել ՆԱՏՕ-ի դաշնակից ռազմական ինքնաթիռներ, որոնք կարող են միջուկային մարտագլխիկներ կրել, հայտարարել է Բալթյան հանրապետության պաշտպանության նախարար Հաննո Պևկուրը Postimees թերթին տված մեկնաբանության մեջ։
Նախարարի խոսքով՝ F-35 կործանիչները, որոնք կարող են կրել տակտիկական միջուկային ռումբեր, արդեն իսկ գտնվում են Էստոնիայում և շուտով կրկին կպահպանեն երկրի օդային տարածքը։
«Եթե այս ինքնաթիռներից մի քանիսը, անկախ իրենց ծագման երկրից, ունեն երկակի նշանակության միջուկային զենք կրելու հնարավորություն, դա չի ազդում F-35-ը ընդունելու մեր դիրքորոշման վրա։ Իհարկե, մենք պատրաստ ենք ընդունել դաշնակիցներ», - հավելել է նա։
Հունիսի 9-ին ՆԱՏՕ-ի գլխավոր քարտուղար Մարկ Ռյուտեն Մեծ Բրիտանիայում կայացած համաժողովում հայտարարեց, որ դաշինքի երկրները մտադիր են ԱՄՆ-ից պատվիրել 700 F-35 ինքնաթիռ հաջորդ չորս տարիների ընթացքում: Հունիսի 24-ին Մեծ Բրիտանիան հայտարարեց, որ կգնի 12 նոր F-35A կործանիչներ և կմիանա ՆԱՏՕ-ի միջուկային առաքելությանը:
