Վլադիմիր Զելենսկիի գրասենյակի ղեկավար Անդրեյ Երմակը Վաշինգտոնում ԱՄՆ նախագահի հատուկ դեսպանորդ Սթիվեն Ուիթկոֆի հետ քննարկել է Ստամբուլում ռուս-ուկրաինական բանակցությունները և հրավիրել նրան Ուկրաինա։«Ուիթկոֆի հետ հանդիպման ժամանակ մենք քննարկեցինք Ստամբուլում ուկրաինական և ռուսական պատվիրակությունների միջև բանակցությունների ընթացքը»,-գրել է Երմակը իր Telegram ալիքում։
Երմակը նշել է, որ ինքը Ուիթկոֆին պատմել է նաև մարտադաշտում Ուկրաինայի զինված ուժերի իրավիճակի մասին և հատուկ դեսպանորդին հրավիրել է «այցելել Ուկրաինա՝ իրավիճակը սեփական աչքերով տեսնելու համար»։
Մինչ այդ, Երմակը նաև ԱՄՆ նախագահի Ուկրաինայի հարցերով հատուկ դեսպանորդ Քիթ Քելլոգին պատմել էր հունիսի 2-ին Ստամբուլում կայացած բանակցությունների մասին: Միևնույն ժամանակ, Զելենսկիի գրասենյակի ղեկավարը Ուիթկոֆի հետ հանդիպման ժամանակ չի բարձրացրել Կիևին ռազմական օգնության հարցը, չնայած նա այս թեման քննարկել է Քելլոգի հետ:
