Ռուսաստանում «Լաբուբու» խաղալիքները վաճառվում են խախտումներով, դրանց վրա չկա ռուսերեն մակագրություն և անհրաժեշտ նշանավորում: Այս մասին РИА Новости-ին հայտնել է ՌԴ Դումայի ընտանիքի պաշտպանության հարցերով կոմիտեի փոխնախագահ Տատյանա Բուցկայան: «Եթե խոսենք այս խաղալիքների (Լաբուբու) վաճառքի մասին Ռուսաստանում, պետք է հասկանալ՝ ունեն արդյոք դրանք դիստրիբյուտոր, և ինչ ճանապարհով են հայտնվում Ռուսաստանում», – նշել է Բուցկայան:
Նրա խոսքով՝ Ռուսաստանում բոլոր մանկական ապրանքները պետք է վաճառվեն որակի հավաստագրերով: Նրա կարծիքով, «Լաբուբու»-ի վաճառքի խախտումները պետք է առանձին քննարկման արժանանան: Նա նաև տեղեկացրել է, որ Դումայում արդեն պատրաստվում է «ճիշտ խաղալիքների» մասին օրինագիծ:
Մինչ այդ ՌԴ գիտությունների ակադեմիայի ակադեմիկոս Գենադի Օնիշչենկոն կոչ էր արել Ռուսաստանի կրթության ակադեմիայի մասնագետներին ուսումնասիրել «Լաբուբու»-ի ազդեցությունը երեխաների հոգեբանության վրա: Նա նշել էր, որ ժամանակակից երեխաները հաճախ հետաքրքրվում են «անսովոր և վախեցնող» խաղալիքներով, և շեշտել է, որ նման ապրանքները պետք է վաճառվեն միայն մասնագետների թույլտվությամբ, հայտնում է Газета.ру-ն:
