Վերջին 24 ժամվա ընթացքում Գազայի հատվածի տարբեր շրջաններին Իսրայելի կողմից հասցված հարվածների հետևանքով զոհվել է առնվազն 70 մարդ։ Այս մասին հայտնել է կատարական «Ալ Ջազիրա» հեռուստաալիքը։Զոհվածների ընդհանուր թվից գրեթե 20 մարդ Գազայի հատվածի կենտրոնական մասում գտնվող Էլ-Բուրեյջ փախստականների ճամբարի ռմբակոծության զոհ է դարձել։ Պաղեստինյան անկլավի առողջապահության նախարարությունը հայտնում է, որ վերջին 24 ժամվա ընթացքում վիրավորվել է առնվազն 184 մարդ։
Հեռուստաալիքը նաև հաղորդում է, որ Իսրայելի պաշտպանության ուժերը շարունակում են հրետակոծել Գազայի հատվածի հարավային հատվածը։ Խան Յունիս քաղաքի մոտակայքում գտնվող Ալ-Մավասի մարդասիրական գոտում փախստականների վրանների գիշերային հրետակոծության հետևանքով զոհվել է առնվազն երեք մարդ, մի քանիսը վիրավորվել են։
Մարտի 18-ին Իսրայելի բանակը վերսկսեց ռազմական գործողությունները Գազայի հատվածում՝ սկսելով զանգվածային հարվածներ անկլավի դեմ և դադարեցնելով հունվարին հաստատված հրադադարը։
