ԱՄՆ վարչակազմի առաջնահերթությունը ուկրաինական հակամարտության կարգավորման հարցում անհապաղ զինադադարն է և ռազմական գործողությունների դադարեցումը։ Այս մասին կիրակի օրը Մեծ Բրիտանիայի արտգործնախարար Դեյվիդ Լամիի հետ հեռախոսազրույցի ժամանակ ասել է ԱՄՆ պետքարտուղար Մարկո Ռուբիոն։
«Պետքարտուղարը կրկնել է Միացյալ Նահանգների դիրքորոշումը Ռուսաստանի և Ուկրաինայի միջև պատերազմի վերաբերյալ. մեր առաջնահերթությունը մնում է ռազմական գործողությունների դադարեցումը և անհապաղ զինադադարի ձեռքբերումը», – ասվում է Պետդեպարտամենտի հայտարարության մեջ:Քննարկելով Հնդկաստանի և Պակիստանի միջև սրվող հակամարտությունը՝ նախարարներն ընդգծել են Նյու Դելիի և Իսլամաբադի կողմից հրադադարի ռեժիմը պահպանելու և շփումները շարունակելու անհրաժեշտությունը։
«Քարտուղարը հայտնել է ԱՄՆ-ի աջակցությունը Հնդկաստանի և Պակիստանի միջև ուղիղ երկխոսությանը և խրախուսել է շարունակական ջանքերը՝ ուղղված հաղորդակցության բարելավմանը», – ասվում է հայտարարության մեջ:Ավելի վաղ ԱՄՆ նախագահ Դոնալդ Թրամփը կոչ էր արել Ուկրաինային անհապաղ համաձայնել իր ռուս գործընկեր Վլադիմիր Պուտինի առաջարկած բանակցություններին, որոնք կարող են տեղի ունենալ Թուրքիայում մայիսի 15-ին։
