2025 թվականի իր Սպիտակ գրքում Ճապոնիայի պաշտպանության նախարարությունը ևս մեկ անգամ կհայտարարի, որ Ռուսաստանի և Չինաստանի միջև ռազմական համագործակցությունը լուրջ մտահոգություններ է առաջացնում Ճապոնիայի անվտանգության տեսանկյունից: Այս մասին հայտնում է Kyodo լրատվական գործակալությունը, որը ստացել է պաշտպանության նախարարության տարեկան զեկույցի նախագիծը։
Զեկույցում նշվում է, որ Ռուսաստանի և Չինաստանի միջև աճող համագործակցությունը, այդ թվում՝ նրանց զինված ուժերի մակարդակով, Ճապոնիայի համար «անվտանգության տեսանկյունից լուրջ անհանգստության տեղիք է տալիս»։
Անցյալ տարվա զեկույցը մոտավորապես նույն ձևակերպումն էր պարունակում։ Միևնույն ժամանակ, ըստ Kyodo-ի, նոր զեկույցը կպարունակի պնդում, որ Ռուսաստանը և Չինաստանը «պետական մակարդակով կիբեռնետիկ հարձակումներ են իրականացնում»։
Նախկինում Ճապոնիան բազմիցս դիվանագիտական ուղիներով իր մտահոգությունները փոխանցել է Ռուսաստանի Դաշնությանը և Չինաստանին՝ կապված համատեղ պարեկության հետ, որոնք պարբերաբար իրականացվում են Ռուսաստանի օդատիեզերական ուժերի և Չինաստանի Ժողովրդաազատագրական բանակի օդուժի կողմից Ճապոնական և Արևելա-չինական ծովերի ջրերում:
