Վրաստանի իշխանությունները պատրաստ են ոչ միայն վերականգնել հարաբերությունները ԱՄՆ-ի նոր վարչակազմի հետ, այլեւ էլ ավելի խորացնել դրանք։ Այս մասին լրագրողներին ասել է իշխող «Վրացական երազանք - դեմոկրատական Վրաստան» կուսակցության գլխավոր քարտուղար, Թբիլիսիի քաղաքապետ Կախա Կալաձեն։
«Վրացական կառավարությունը պատրաստ է բարեկամության և գործընկերության: Մենք պատրաստ ենք էլ ավելի խորացնել հարաբերությունները, վերագործարկել դրանք, ինչն էլ ակնկալում ենք ԱՄՆ նոր վարչակազմից: ԱՄՆ-ի հետ հարաբերությունները մեզ համար կարևոր են: Այն հարաբերությունները, որոնք մենք ունեցել ենք, անընդունելի են ոչ մեզ, ոչ էլ նրանց համար»,- ասել է Կալաձեն:
Քաղաքական գործիչը ևս մեկ անգամ հիշեցրել է, որ Վրաստանը ինքնիշխան երկիր է, որը թույլ չի տա որևէ մեկին օգտագործել այն սեփական շահերի համար։
«Մենք ցանկանում ենք բարեկամ լինել և համագործակցել թե՛ Եվրոպայի, թե՛ ԱՄՆ-ի հետ, մենք չենք ցանկանում տիրական վերաբերմունք, մենք դա թույլ չենք տա, դա սխալ է»,- ընդգծել է Կալաձեն։
