Ավելի քան մեկ միլիոն երեխա Լիբանանում զրկվել է կրթություն ստանալու հնարավորությունից՝ երկրում կռիվների պատճառով: Այս մասին հայտարարել է ՄԱԿ-ի մանկական հիմնադրամի գործադիր տնօրենի տեղակալ Թեդ Չայբանը։
«1,2 միլիոն երեխա զրկված է կրթություն ստանալու հնարավորությունից», - մեջբերում է նրա խոսքերը «Ասոշիեյթեդ պրես» գործակալությունը:
Նա հավելել է, որ ավելի քան 400,000 երեխաներ Լիբանանում ստիպված են եղել լքել իրենց տները վերջին երեք շաբաթվա ընթացքում, նրանցից շատերը գերբնակեցված ժամանակավոր կացարաններում են, թեև մի քանի մասնավոր դպրոցներ դեռևս գործում են, Լիբանանի հանրային դպրոցների համակարգը մեծ հարված է ստացել:
Սա բացասաբար է անդրադառնում ոչ միայն լիբանանցի երեխաների, այլև երկրի բնակչության առավել խոցելի խմբերի երեխաների կրթության վրա, ինչպիսիք են պաղեստինցիները և սիրիացի փախստականները:
