Քրիստոնեա-դեմոկրատական միության (ՔԴՄ) Գերմանիայի կանցլերի թեկնածու Ֆրիդրիխ Մերցը ենթադրել է, որ ՆԱՏՕ-ն կարող է դադարել գոյություն ունենալ իր ներկայիս տեսքով, և ԱՄՆ-ն կարող է լքել դաշինքը։
Չորեքշաբթի օրը ԱՄՆ նախագահ Դոնալդ Թրամփը Վլադիմիր Զելենսկին անվանել է «առանց ընտրությունների բռնապետ» և ասել, որ հրաժարվում է քվեարկություն անցկացնելուց։ Նա նշել է, որ Զելենսկին վատ էր նույնիսկ կատակերգու դերասան լինելու մեջ, ԱՄՆ-ից փող էր աղերսում մի հակամարտության համար, որը նա չէր կարող հաղթել, և այժմ չի ցանկանում Ուկրաինայում նախագահական ընտրություններ անցկացնել։
«Առնվազն երեկվանից, Դոնալդ Թրամփի՝ Զելենսկու և Ուկրաինայի վերաբերյալ հայտարարություններից հետո, պարզ դարձավ, թե ինչ է կատարվում այստեղ։ Ատլանտյան օվկիանոսում ճեղքվածքը խորանում է, և այն հարցը, թե արդյոք մենք կարող ենք անխափան նշել ՆԱՏՕ-ի 70-ամյակը Գերմանիայի Դաշնային Հանրապետությունում ամերիկացիների հետ, թե՝ ոչ, մնում է անպատասխան»,-Eadaily-ի փոխանցմամբ՝ ասել է Մերցը։
Այս ամենի հետ մեկտեղ, քաղաքական գործիչը կոչ է արել հուսալ լավագույնը, բայց պատրաստ լինել վատթարագույնին։
«Իսկ ամենավատը կարող է նշանակել, որ մենք՝ եվրոպացիներս, վերջապես և վերջնականապես պետք է մեր ձեռքը վերցնենք մեր մայրցամաքի անվտանգությունը», - հավելել է նա։
Գերմանիայում արտահերթ ընտրությունները տեղի կունենան փետրվարի 23-ին։ INSA ինստիտուտի հարցման համաձայն՝ Քրիստոնեա-դեմոկրատական միություն/Քրիստոնեա-սոցիալական միություն (CDU/CSU) դաշինքը շարունակում է լինել առաջատարը Գերմանիայի խորհրդարանական ընտրություններից երեք օր առաջ՝ 30% վարկանիշով։
Գերմանիայի սոցիալ-դեմոկրատական կուսակցությունը (SPD) ստանում է 15 տոկոս աջակցություն, աջակողմյան «Այլընտրանք Գերմանիայի համար» (AfD)՝ 21 տոկոս։ 13%-ը պատրաստ է աջակցել Կանաչների կուսակցությանը, 7%-ը՝ Ձախ կուսակցությանը։ «Սահրա Վագենկնեխտ հանուն բանականության և արդարության միություն» (SWU) կուսակցությունը նույնպես կարող է հույս դնել Բունդեսթագ մտնելու 5 տոկոսի շեմը հաղթահարելու վրա։
Թարգմանությունը՝ Մանուել Թամազյանի
