Հյուսիսի՞ց, թե՞ հարավից փչող սառը քամիներն են գնալով սառեցնում հյուսիսային գործընկերոջ հետ Հայաստանի փոխգործակցությունը: Պաշտոնական Երևանի հարաբերությունները ցրտաշունչ Մոսկվայի հետ վերջին տարիներին առանձնակի ջերմությամբ աչքի չեն ընկնում: Վարչապետ Նիկոլ Փաշինյանը հերթով սառեցնում է Ռուսաստանի հետ կապերի առանցքային օղակները:
Ռուսաստանցի բարձրաստիճան պաշտոնյաներն արդեն հրապարակայնորեն ընդունում են, որ Եվրամիության ուղղությամբ արվող քայլերի հետևանքով Հայաստանը կարող է դուրս գալ ԵԱՏՄ-ից:
Ամենասուր հարցերից մեկն այս շարքում, իհարկե, ՀԱՊԿ-ի հարցն է:Այս շաբաթ հրապարակային դաշտում կրկին քննարկման թեմա դարձավ Հավաքական անվտանգության պայմանագրի կազմակերպությանը՝ Մոսկվայի առաջնորդած ՀԱՊԿ-ին Հայաստանի անդամակցության հարցը: Հունվարի 23-ին Ռուսաստանի Դաշնության նախագահի մամուլի քարտուղար Դմիտրի Պեսկովը մեկնաբանել է ՀՀ արտաքին հետախուզության ծառայության զեկույցում ՀԱՊԿ-ի մասին տեղ գտած անդրադարձը՝ նշելով, որ Հայաստանի վարչապետն ու Ռուսաստանի նախագահը նախորդ շաբաթ տեղի ունեցած հեռախոսազրույցի ընթացքում չեն քննարկել ՀԱՊԿ-ում Հայաստանի մասնակցության սառեցման թեման: Պեսկովը նաև հավելել է, որ Հայաստանը մինչ օրս չի հայտարարել ՀԱՊԿ-ը լքելու ցանկության մասին:Մանրամասները՝ տեսանյութում:
Հեղինակ՝ Արամ Սարգսյան
