Հունվարի 21-ին շարունակվեց Արցախի ռազմաքաղաքական ղեկավարության և մյուս գերիների նկատմամբ դատավարությունը:
NEWS.am-ը դատավարության հետ կապված մի քանի հարց է ուղղել ՄԻԵԴ-ում հայ գերիների շահերի պաշտպան, փաստաբան Սիրանուշ Սահակյանին:
– Տիկին Սահակյան, երեկ շարունակվեց դատավարությունը Արցախի ռազմաքաղաքական ղեկավարության և մյուս գերիների նկատմամբ: Փորձում են դատավարության ձևական կողմն ապահովել, հրապարկվում են ցուցմունքներ Արայիկ Հարությունյանից:
Ադրբեջանական լրատվամիջոցները նաև հաղորդեցին, որ փաստաբաններն իրենց պաշտպանյալների խափանման միջոցը տնային կալանքով փոխարինելու միջնորդություն են ներկայացրել:
Սակայն չի հստակեցվում, թե ինչ է նշանակում տնային կալանք հայ գերիների դեպքում։ Ինչպե՞ս եք գնահատում այս ամենը:
– Այս գործընթացն Ադրբեջանից զատ այլ ատյաններ չեն ընդունելու ու լեգիտիմ չեն ճանաչելու, և դատական ակտերը ևս ոչ լեգիտեմ են համարվելու: Սա արհեստականգործընթաց է: Գործ ունենք շինծու դատավարությունների հետ, որոնց հիմնական նպատակը Արցախի ղեկավարությանը պատժելն է հանուն Արցախի պետականության իրականացրած գործունեության համար: Այս անձանցմիջոցով նրանք դատապարտում են Արցախի ինքնորոշման իրավունքը և այդ գործընթացում ներգրավվածություն ունեցող անձանց: Եվ ստորացումներն էլ ուղղված են ոչ միայն քաղբանտարկյալներին, այլ ողջ հայ ժողովրդին: Ցուցմունքների մասով էլ պետք է նկատի ունենալ, որ դրանք կորզվում են կյանքի սպառնալիքի տակ, գրվում են հատուկ ծառայությունների կողմից և հարկադրվում են հայ պատանդներին ու գերիներին:
Ինչ վերաբերում է խափանման միջոցը տնային կալանքով փոխարինելու երեկվա միջնորդություններին, ապա այժմ դեռ փորձում ենք հասկանալ խնդիրը:
– Տիկին Սահակյան, Դուք և հայկական մի շարք իրավապաշտպան կազմակերպություններ դիմել էիք միջազգային կազմակերպությունների, Բաքվում հավատարմագրված դեսպանների՝ կոչ անելով մշտադիտարկում իրականացնել դատական գործընթացի նկատմամբ: Տեղեկություններ ունեք արդյոք՝ Բաքվում հավատարմագրված օտարերկրյա դիվանագետներ կամ միջազգային կազմակերպությունների ներկայացուցիչներ մասնակցո՞ւմ են դատավարությանը:
– Արձագանքները դեռ ստացվում են: Տեղեկությունն ամբողջացնելուց հետո կհրապարակենք: Բայց արդեն հայտնի են դեպքեր, երբ իրավապաշտպանները դիմել են Ադրբեջանին, մուտքի թույլտվություն են խնդրել դատական նիստերին ներկա գտնվելու նպատակով, բայց նրանց մուտքի արտոնագիր չի տրամադրվել:
– Նիստերին ներկա են լինում սահմանափակ թվով ադրբեջանական լրատվամիջոցներ, որոնք հրապարակում են գրեթե նույնաբովանդակ նյութեր: Արդյո՞ք ունեք լրացուցիչ այլ տեղեկություններ:
– Ռուբեն Վարդանյանի ընտանիքից ինձ հասած տեղեկություններով, որը նրանց է փոխանցվել Ադրբեջանում նրա փաստաբան Աբրահամ Բերմանի միջոցով, հենց առաջին նիստում Ռուբեն Վարդանյանը հայտարարել է, որ իրեն մեղավոր չի ճանաչում:
Վարդանյանը նաև առաջարկել է մեկ րոպե լռությամբ հարգել հակամարտության զոհերի հիշատակը՝ անկախ ազգությունից: Դատավորը նշել է, որ նման բան օրենսդրությամբ նախատեսված չէ: Վարդանյանն այնուհետ ներկայացրել է երկու միջնորդություն՝ գործերի միավորման և գործի նյութերին ծանոթանալու նպատակով լրացուցիչ ժամանակի տրամադրման վերաբերյալ: Ադրբեջանական լրատվամիջոցները հայտնել էին միայն միջնորդությունների մասին:
