Թուրքիայում նախագահ Ռեջեփ Թայիփ Էրդողանի գլխավորությամբ տեղի է ունեցել տարվա առաջին Ազգային անվտանգության խորհրդի նիստը։
Թուրքական Milliyet–ի փոխանցմամբ՝ Ազգային անվտանգության խորհրդի նիստի ավարտին հրապարակվել է հայտարարարություն, ըստ որի, 5 տարին մեկ, ելնելով իրավիճակի անհրաժեշտությունից, թարմացվում է Ազգային անվտանգության քաղաքականության փաստաթուղթը։ Նոր փաստաթղթի մեջ ներառվել են աշխարհում եւ տարածաշրջանում տեղի ունեցող զարգացումներից ելնելով Թուրքիայի համար անհրաժեշտ քաղաքական ուղեգծերը։
Խորհրդի նիստի ավարտին հրապարակված 7 կետանոց հայտարարության մեջ անդրադարձ է կատարվել Թուրքիայի ներքին եւ արտաքին քաղաքականության հետ կապված զարգացումներին, քրդական PKK–ի եւ գյուլենական շարժման դեմ պայքարին, Սիրիայի նոր իշխանությունների կողմից երկրի անվտանգության եւ ամբողջականության հետ ապահովման հարցերին, Սիրիայում քրդական PKK-ի եւ նրա թեւերի գոյության հետ կապված խնդիրներին, Գազայում զինադադարի ապահովման եւ Պաղեստինի հարցի արդարացի լուծման ուղիներին, Աֆրիկայում, Մերձավոր Արեւելքում եւ Բալկաններում խնդիրների՝ առանց բախումների լուծելու Թուրքիայի դերակատարություններին։
