ԱՄՆ նախագահ Դոնալդ Թրամփը կձգտի հասնել այն բանին, որ ՆԱՏՕ-ի անդամ պետությունները պաշտպանական ծախսերը հասցնեն իրենց ՀՆԱ-ի մինչև 5%-ի մակարդակին, այս մասին Թրամփը հայտարարել է հունվարի 20-ի երեկոյան Սպիտակ տան Օվալաձև աշխատասենյակում լրագրողների հետ կայացած զրույցի ժամանակ։
«ՆԱՏՕ-ն պետք է ավելի շատ գումար վճարի: ՆԱՏՕ-ն պետք է վճարի 5 տոկոս», - ընդգծել է Թրամփը։ԱՄՆ վարչակազմի ղեկավարը բողոքել է այն բանից, որ ԱՄՆ-ն 200 միլիարդ դոլարով ավելի շատ է ծախսել Ուկրաինային ռազմական օգնություն ցուցաբերելու վրա, քան Հյուսիսատլանտյան դաշինքի մյուս երկրները։ «Նրանք պետք է հավասարեցնեն դրությունը», - ասել է Թրամփը։
ՆԱՏՕ-ի երկրների կողմից պաշտպանական ծախսերը 5%-ի հասցնելու անհրաժեշտության մասին Թրամփը հայտարարել էր դեռ անցյալ շաբաթ։ Ըստ Euronews-ի՝ Գերմանիայի, Ֆրանսիայի, Մեծ Բրիտանիայի, Իտալիայի և Լեհաստանի պաշտպանության նախարարները, արձագանքելով Թրամփի հայտարարությանը, հունվարի 14-ին հայտարարել էին, որ մտադիր են շարունակել ավելի շատ ներդրումներ կատարել պաշտպանության ոլորտում, սակայն Դոնալդ Թրամփի նշած նպատակակետին հասնելը դժվար կլինի:
ՆԱՏՕ-ի երկրները ռազմական ծախսերը մինչև ՀՆԱ-ի 2%-ի հասցնելու խնդիրը դրել են 2014 թ. սեպտեմբերին Ուելսում կայացած գագաթնաժողովում՝ դա պատճառաբանելով «ռուսական սպառնալիքով»։ Դա տեղի է ունեցել այն բանից հետո, երբ Ղրիմն անցել է Ռուսաստանի վերահսկողության տակ։ 2023 թ. հուլիսին Վիլնյուսի գագաթնաժողովում որոշում էր ընդունվել, որ ՆԱՏՕ-ի պետությունների համար ՀՆԱ-ի 2%-ը պետք է դառնա ոչ թե նպատակակետ, այլ պաշտպանական ծախսերի նվազագույն մակարդակ։
