Ադրբեջանից Սերբիա գազի մատակարարումները դադարեցվել են, և հայտնի չէ, թե երբ դրանք կվերսկսվեն։
Այս մասին շաբաթ օրը՝ հունվարի 11-ին, հայտարարել է Սերբիայի նախագահ Ալեքսանդր Վուչիչը, փոխանցում է Tanjug գործակալությունը։
Նրա խոսքով՝ ադրբեջանական կողմը հայտնել է մատակարարումների դադարեցման մասին։
«Ես տեղեկություն եմ ստացել մեր ադրբեջանցի եղբայրներից և ընկերներից, որ ֆորսմաժորային հանգամանքների և նրանց մոտ առաջացած խնդիրների պատճառով մենք չենք կարող հույս դնել այն 1,7 միլիոն խորանարդ մետր գազի վրա, որը մատակարարվում էր օրական»,- ասել է Վուչիչը։
Ինչպես նշել է նա, դեռ պարզ չէ, թե երբ կվերսկսվի գազի մատակարարումը։
«Սա նշանակում է, որ այսուհետ մենք կսկսենք օգտագործել գազի մեր պաշարները»,- ասել է Վուչիչը։ Նա հույս է հայտնել, որ մատակարարումները կվերսկսվեն մեկ-երկու ամսից։
Բաքվում, սակայն, հերքել են Վուչիչի հայտարարությունները։ Ադրբեջանական AnewZ հեռուստաալիքը, հղում անելով կառավարության «հավաստի» աղբյուրներին, նշել է, որ Ադրբեջանից Սերբիա գազի մատակարարման երկամսյա դադարեցման մասին հաղորդագրությունները չեն համապատասխանում իրականությանը։
Ադրբեջանական լրատվամիջոցի հաղորդմամբ, չնայած այն հանգամանքին, որ գազի մատակարարումը ժամանակավորապես կրճատվել է «Շահ Դենիզ Ալֆա» հարթակի տեխնիկական խնդրի պատճառով, աղբյուրները հավաստիացրել են, որ «Շահ Դենիզ Բրավո» հարթակը շարունակում է աշխատել ամբողջ հզորությամբ՝ ապահովելով արտահանման անընդհատությունը։ Սպասվում է, որ առաքումները շատ շուտով կվերսկսվեն։
