Ռուսաստանի Քննչական կոմիտեի նախագահը հանձնարարել է զեկուցել Ստավրոպոլի երկրամասի բնակչուհիների նկատմամբ անօրինական գործողությունների փաստով հետաքննության ընթացքի մասին։ Այս մասին տեղեկանում ենք ՌԴ Քննչական կոմիտեի տելեգրամյան էջից։
Ինչպես հաղորդվում է, Պրեդգորնիի մունիցիպալ շրջանի դպրոցներից մեկում որոշ աշակերտներ միջոցառման ժամանակ սկսել են ծածանել իրենց ազգային դրոշները: Այն բանից հետո, երբ ուսուցիչները վերցրել են դրոշները դեռահասներից, նրանք սկսել են սպառնալիքներ ստանալ անհայտ անձանց կողմից։ Բացի այդ, սփյուռքի համայնքների ներկայացուցիչները ուսուցիչների դեմ բողոքներ են ուղարկում տարբեր ատյաններ՝ նրանց աշխատանքից հեռացնելու պահանջով։
Ավելի վաղ համացանցում տեղեկություն էր հայտնվել, որ դպրոցական դիսկոտեկում մի քանի դեռահասներ ծածանել են Հայաստանի և Հունաստանի դրոշները։ Ապա ուսուցիչները դպրոցականների ձեռքից վերցրել են դրոշները, քանի որ, ինչպես նշվում է, տոնը «նվիրված է եղել Ամանորին, այլ ոչ թե տարբեր երկրների մշակույթներին»։
