Մասիսի համայնքապետ Դավիթ Համբարձումյանը շնորհավորական ուղերձ է հղել, որում ասված է․
«Հարգելի՛ հայրենակիցներ,
Սիրելի՛ բնակիչներ,
Մասիս համայնքում հանգրվանած բազմահազար արցախցի մեր բարեկամներ,
Այսօր կանգնած ենք Նոր տարվա շեմին՝ լի սպասումներով, ակնկալիքներով, բայց՝ նաև մտահոգություններով, քանզի նույնն են մարտահրավերները, անվտանգային խնդիրները շարունակում են մնալ չլուծված:
Այսօր փակում ենք 2024 թվականի վերջին էջը՝ ամփոփելով կատարված աշխատանքները, արձանագրված ձեռքբերումները:
Չնայած առկա դժվարություններին, այդուհանդերձ, հետևողական և համագործակցային աշխատանքի արդյունքում 2024 թվականին Մասիս համայնքում իրականացվեցին համայնքային կարևորության մի շարք ծրագրեր, որոնց արդյունքում համայնքի տարբեր բնակավայրերում ամբողջապես լուծվեցին այս կամ այն խնդիրները, որոնք տարիներ շարունակ համարվել են անլուծելի:
Համայնքապահպան ծրագրերի իրականացումը կշարունակվի նաև 2025 թվականի ընթացքում՝ նպաստելով համայնքի զարգացմանն ու հզորացմանը:
Սակայն, համայնքային կամ անձնական խնդիրներից առավել այսօր մեզանից յուրաքանչյուրին անհանգստացնում են մեր երկրում տիրող իրավիճակը, առկա մարտահրավերները: Սասանված է հավատը վաղվա օրվա նկատմամբ:
Սիրելի՛ հայրենակիցներ,
Ամանորի նախաշեմին մաղթում եմ, որ տոկուն լինենք ու հավատով լեցուն: Մենք այլընտրանք չունենք, քանզի հազարավոր անմահացած հայորդիները մեզ այլ պատգամ են տվել. մենք պարտավոր ենք պահպանել նրանց արյան գնով պաշտպանված հողը: Մենք պետք է ավարտին հասցնենք նրանց անավարտ թողած գործերը: Մենք պետք է հավատանք, որ բազմաթիվ փորձություններ հաղթահարած հայ ժողովուրդը կրկին հաղթանակներ է տոնելու:
Սիրելի՛ հայրենակիցներ,
Թող 2025 թվականը լինի նպատակների իրականացման, դրական փոփոխությունների, հույսի ու հավատի վերականգնման, խաղաղության ու հաղթանակների տարի։
Շնորհավո՛ր Ամանոր և Սուրբ Ծնունդ»։
