ԱՄՆ փոխնախագահ Ջ.Դ. Վենսը համեմատել է արհեստական բանականության շուրջ առաջացած աղմուկը և այն կառավարության մակարդակով կարգավորելու փորձերը COVID-19 համավարակի հետ։ «Ես իրականում նման զգացողություն ունեի COVID-ի ժամանակ, երբ թվում էր, թե մեծ խուճապ կա։
Ռիսկերը իրական են, ինչպես COVID-ի դեպքում, բայց ձեռնարկված միջոցառումները միշտ չէ, որ համարժեք են եղել կամ համապատասխանում են այդ ռիսկերի մասշտաբներին», - ասել է նա NBC News-ին տված հարցազրույցում։ Վենսը կարծում է, որ արհեստական բանականության կարգավորման պատասխանատվությունը հիմնականում պետք է կրեն մշակող ընկերությունները, որոնք, նրա խոսքերով, «ազատ են արձակել Ֆրանկենշտեյնի հրեշին» և այժմ կարիք ունեն կառավարության օգնության։
«Դե, կառավարությունը կարող է օգնել՝ ապահովելով, որ այս Ֆրանկենշտեյնը արձակողները պատասխանատվության ենթարկվեն», - ընդգծել է փոխնախագահը։ Նա մտահոգություն է հայտնել, որ արհեստական բանականության համար կարգավորող համակարգ ստեղծելու ներկայիս փորձերը արդյունավետորեն ազատում են մշակողներին պատասխանատվությունից և չեն կարողանում լուծել իրական ռիսկերը։
