Սեպտեմբերի 19-ից մինչև սեպտեմբերի 20-ի առավոտ Աջարիայի ափամերձ հատվածում և հարակից տարածքներում հորդառատ անձրևներ են տեղացել։ Բաթումիի որոշ հատվածներում փողոցներ են հեղեղվել, իսկ քաղաքային ենթակառուցվածքները ժամանակավորապես գերբեռնվել են։ Այս մասին հայտնել է Վրաստանի Շրջակա միջավայրի ազգային գործակալությունը։
Գործակալության տվյալներով՝ Բաթումիում անձրևն առանց ընդհատման շարունակվել է 21 ժամ։ Սեպտեմբերի 19-20-ը գրանցվել է ընդհանուր 275 միլիմետր տեղում, ինչը գերազանցում է ամսական կլիմայական նորմայի 90 տոկոսը։
Միայն մեկ ժամում՝ սեպտեմբերի 19-ի ժամը 21:00-ից 22:00-ն, տեղացել է 52,5 միլիմետր անձրև՝ ընդհանուր քանակի շուրջ 20 տոկոսը։
Բաթումիի օդերևութաբանական կայանում 24 ժամվա ընթացքում գրանցվել է 273 միլիմետր տեղում։ Գործակալության տվյալներով՝ սեպտեմբեր ամսվա համար այս ցուցանիշն աննախադեպ է և համապատասխանում է մոտ 100 տարին մեկ անգամ կրկնվող ուժգնությամբ տեղումների։
Սեպտեմբերի 19-20-ը Կոբուլեթիում գրանցվել է 134,5 մմ, Մտիրալա ազգային պարկում՝ 93 մմ, Կոխիում՝ 58,5 մմ, իսկ Խելվաչաուրիի Սինդիեթի կայանում՝ 50,8 մմ տեղում։
Շրջակա միջավայրի ազգային գործակալությունը շարունակում է հիդրոօդերևութաբանական պայմանների մշտադիտարկումը։
