Ֆրանսիան մտադիր է Կիևին մատակարարել SCALP հրթիռների լրացուցիչ խմբաքանակ՝ «առաջնագծից դուրս գրոհելու», ինչպես նաև «Միստրալ» հրթիռներ՝ հակաօդային պաշտպանության համար։ Այս մասին Le Journal du Dimanche թերթին տված հարցազրույցում ասել է Ֆրանսիայի զինված ուժերի նախարար Սեբաստիան Լեկորնյուն, փոխանցում է ՏԱՍՍ-ը:
«Մենք կրկին կմատակարարենք «Միստրալ» հրթիռներ, մասնավորապես՝ մարտական գոտիների պաշտպանության համար։ Ես հրաման եմ ստորագրել մոտ տասը SCALP հրթիռների նոր խմբաքանակ փոխանցելու մասին՝ համաձայն Ֆրանսիայի նախագահ Էմանուել Մակրոնի խոստումների, որոնք նա տվել է Վլադիմիր Զելենսկիին»,- ասել է նախարարը։
Սեբաստիան Լեկորնյուն վստահեցրել է, որ Փարիզը կշարունակի աջակցել Կիևին, ինչը, ըստ նրա, պետք է թույլ տա Ուկրաինայի իշխանություններին դիտարկել որոշ «քաղաքական լուծումներ»։
