ՄԱԿ-ի գլխավոր իրավապաշտպանը մտահոգություն է հայտնել Եմենում ռազմական գործողությունների սրման ֆոնին խաղաղ բնակչության շրջանում զոհերի թվի աճի կապակցությամբ և կոչ է արել ջանքեր գործադրել, որպեսզի երկիրը կրկին չընկղմվի լայնածավալ պատերազմի հորձանուտը։
«Ես կոչ եմ անում բոլոր կողմերին թուլացնել լարվածությունը և ազատել եմենյան ժողովրդին նոր տառապանքներից։ Եմենցիներն արդեն իսկ չափազանց ծանր են տուժել բազմամյա հակամարտությունների, տեղահանումների և հումանիտար ճգնաժամի կործանարար հետևանքներից, - հայտարարել է Ֆոլկեր Տյուրկը։ - Ես վճռականորեն կոչ եմ անում բոլոր կողմերին անհապաղ դադարեցնել ցանկացած գործողություն, որը կարող է Եմենը վերադարձնել լայնածավալ հակամարտության»։
ՄԱԿ-ի Մարդու իրավունքների վարչությունը հայտնել է, որ օգոստոսի 6-ից հութիների կողմից կառավարության վերահսկողության տակ գտնվող շրջանների վրա հարձակումների հետևանքով զոհվել է առնվազն յոթ խաղաղ բնակիչ, ևս 10-ը վիրավորվել են, մինչդեռ հուլիսի վերջին հութիների վերահսկողության տակ գտնվող շրջաններում հաղորդվել էր երկու խաղաղ բնակչի վիրավորման մասին։
Օգոստոսի 9-ին հութիների կողմից Կարմիր ծովի ափին գտնվող Մոխա նավահանգստի վրա իրականացված հրթիռակոծությունների և անօդաչու թռչող սարքերի հարձակումների հետևանքով զոհվել է նավահանգստի երեք աշխատակից, ևս չորս մարդ վիրավորվել է, հայտնել են վարչությունից։
Գերատեսչությունում հավելել են, որ խմբավորման կողմից օգոստոսի 11-ին Բաբ էլ-Մանդեբի նեղուցում բեռնանավի վրա իրականացված ևս մեկ հարձակման հետևանքով, ըստ հաղորդումների, զոհվել է անձնակազմի չորս անդամ (երեք պակիստանցի և մեկ ինդոնեզացի), իսկ մի քանի ուրիշներ վիրավորվել են։
Մարդու իրավունքների վարչությունում ընդգծել են, որ հարձակումների հետևանքով տուժել են նաև քաղաքացիական ենթակառուցվածքի բազմաթիվ օբյեկտներ, ներառյալ վառելիքի պահեստները և Մոխայում Սաուդյան դաշտային հոսպիտալի հարակից բնակելի համալիրը։
«Հարվածները քաղաքացիական ենթակառուցվածքին սպառնում են էլ ավելի խորացնել խաղաղ բնակչության տառապանքները այն ժամանակ, երբ առնվազն 18 միլիոն եմենցիներ արդեն բախվում են պարենային անապահովության,-հայտարարել է Տյուրկը։- Այդ հարձակումները պետք է անհապաղ դադարեցվեն»։
