Ուկրաինայում բենզալցակայանների ցանցերը մեկ լիցքավորման հաշվով սկսում են կիրառել դիզելային վառելիքի վաճառքի սահմանափակումներ, որոնք տատանվում են 50-ից 100 լիտրի սահմաններում։ Այս քայլը հիմնականում տարածվում է մայրուղիներում գտնվող կայանների վրա, որոնցից օգտվում են բեռնատարների վարորդներն ու երկար տարածություններ փոխադրողները։ Նրանց համար այժմ ավելի ձեռնտու է լիցքավորվել բենզալցակայաններում, քան նավթամբարներում, քանի որ մեծածախ և մանրածախ գների միջև տարբերությունը էապես նվազել է։
Մի շարք օպերատորներ արդեն դիմում են այս քայլին. օրինակ՝ OKKO ցանցում մեկ լիցքավորման առավելագույն շեմը սահմանվել է 100 լիտր։ Սահմանափակումների նպատակն է կանխել վառելիքի պաշարների արագ սպառումը, քանի որ լոգիստիկ շղթաները ոչ միշտ են հասցնում ժամանակին լրացնել դրանք։ Դեֆիցիտը հետևանք է Ուկրաինա մատակարարումների կտրուկ նվազման, Եվրոպայից առաքումների սահմանափակման, ինչպես նաև Դանուբի ծանծաղացման, ինչը բարդացրել է գետային փոխադրումները։ Միևնույն ժամանակ, երկիրը դժվարանում է պակասորդը լրացնել այլ ուղղությունների հաշվին։
Ըստ փորձագիտական գնահատականի՝ մոտ ապագայում դիզվառելիքի վաճառքի լիակատար դադարեցում չի կանխատեսվում, սակայն առանձին բենզալցակայաններում այն պարբերաբար անհասանելի է դառնալու։ Հուլիսի 31-ի դրությամբ Ուկրաինայում դիզելային վառելիքի միջին արժեքը հասել է 90,55 գրիվնայի (2,03 դոլար)՝ մեկ լիտրի դիմաց։
