Հունգարիայի վարչապետ Պետեր Մադյարը հայտարարել է, որ Դանուբում ջրի մակարդակի կտրուկ նվազման պատճառով «Պակշ» ատոմային էլեկտրակայանը կարող է ամբողջությամբ դադարեցնել աշխատանքը, հայտնում է 24.hu։
Կառավարության ղեկավարը արտակարգ տեսաուղերձում հայտնել է, որ գիշերը և առավոտյան կայանում իրականացվել են էներգաբլոկների նոր դադարներ։ ԱԷԿ-ի հզորությունը սովորական 2000 մեգավատից նվազել է մինչև 480 մեգավատ։ Արտադրության կորստի պատճառով հունգարական էներգահամակարգի օպերատոր MAVIR-ը ստիպված է եղել լուրջ խափանումների դեպքում գործողությունների արձանագրություն գործարկել։
Ավելի վաղ Մադյարը ասում էր, որ կայանի աշխատանքի ամբողջական դադարեցումը կարող է լինել երկուշաբթի օրը, սակայն ջրի մակարդակի նվազումն արագացել է, և անջատումը կարող է տեղի ունենալ ավելի շուտ։
Էներգահամակարգը կայունացնելու համար իշխանությունները ծրագրում են գործի դնել պահուստային էլեկտրակայանները։ Բացի այդ, սպասվում է, որ կիրակի օրվանից վերանորոգումից հետո կրկին կաշխատի Դանուբյան ՋԷԿ-ի բլոկներից մեկը (400 մեգավատ հզորությամբ)։ Խոշոր արդյունաբերական սպառողներն արդեն կամավոր կրճատել են էլեկտրաէներգիայի սպառումը մոտ 240 մեգավատով, սակայն դա կարող է բավարար չլինել «Պակշ» ԱԷԿ-ի հզորության հետագա նվազման դեպքում։
Կառավարությունը նաև փոխել է էներգասպառման հնարավոր սահմանափակումների կարգը։ Առաջին հերթին սպառումը կխնդրեն կրճատել խոշոր ձեռնարկություններին։ Եթե դա բավարար չլինի, MAVIR օպերատորը կկարողանա արդյունաբերության համար պարտադիր սահմանափակումներ մտցնել՝ ընդհուպ մինչև առանձին ընկերությունների անջատումը ցանցից։ Բնակչության համար սահմանափակումներ կարող են մտցվել միայն ամենավերջին տարբերակում։
Լրացուցիչ միջոցների թվում իշխանությունները հայտարարել են՝
• երկուշաբթիից ամենածանրաբեռնված ժամերին՝ 17:00-ից 22:00-ը, բեռնատար երկաթուղային երթևեկության դադարեցում,
• հաջորդ շաբաթվա առաջին երեք օրերին պետական ծառայողների հեռավար աշխատանքի անցում,
• մասնավոր ընկերությունների գրասենյակային շենքերի օգտագործումը կրճատելու հանձնարարական,
• պետական հաստատությունների դեկորատիվ լուսավորության անջատում,
• ջրի ոչ էական սպառման սահմանափակումների սահմանում, ներառյալ մարզական օբյեկտների ոռոգում ու լողավազանների լցնում։
Մադյարը նաև հայտարարել է, որ կառավարությունը հանձնարարել է ամենաշատ տուժած շրջաններում մտցնել ջրի օգտագործման սահմանափակումների երրորդ՝ ամենաբարձր մակարդակը։
Վարչապետը ներկայիս իրավիճակի պատասխանատվությունը դրել է նախորդ կառավարության վրա՝ հայտարարելով, որ իշխանությունները դեռ 2018 թվականից գիտեին «Պակշ» ԱԷԿ-ի մոտ ջրի մակարդակի անկման հետ կապված ռիսկերի մասին, սակայն հովացման համակարգի արդիականացման անհրաժեշտ միջոցները ձեռնարկվել են բավականին ուշ։
